Qırımtatar Milliy Meclisiniñ reisi Refat Çubarov Kiyevde qırımtatar halqı sürgünliginiñ yıllığına bağışlanğan hatıra aqşamında çıqışta bulunıp, al-azırda tamır halqı yarımadada kene de basqı ve cinaiy taqiplerge oğray, dep qayd etti.
Bu aqqında Ukraina prezidenti memuriyetiniñ resmiy saytında aytıla.
Çubarovnıñ bildirgenine köre, qırımtatarlar yarımadada «halqnı maneviy ve fizik ceetinden yoq etmek içün yapılğan basqığa oğraylar, biñlernen faal ve adiy qırımlı açılğan sahte taqiplerge oğraylar, elâk olğan ecdatlarını añamaylar».
«Bu kütleviy numayışlarnıñ yasağı degil – er bir qırımtatarınıñ genetik kodunı yañıdan yazacaq olalar, onıñ keçmişnen bağlı hatıralarını silecek olalar», – dep qayd etti o.
«Bizim fikirimizce, Qırım keri qaytarılmasa, Ukraina devleti Avropa halqlarınıñ serbest aileleriniñ azası olamay. Qırımnı keri qaytarmaq içün Ukrainanı qorumalımız», – dep ayttı Çubarov.
Mayıs 18-de Kiyevde ve Ukrainanıñ diger şeerlerinde, em de çetelde Qırımtatar halqı sürgünliginiñ qurbanlarınıñ hatırasına matem tedbirleri olıp keçti.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Bu sene Qırımtatar Milliy Meclisine miting keçirmege izin bermediler.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Aqmescitte bazarertesi künü Qırımnıñ Rusiye akimiyeti qırımtatarlarğa sürgünlik yıllığına bağışlanğan avtoyürüşni keçirmege izin bermedi. Aktsiyanıñ iştirakçilerini başta OMON blok etti, soñra ise yaqalap politsiya bölügine alıp kettiler.
