Amerika Qoşma Ştatları qırımtatarlarnıñ sovetler akimiyeti tarafından vatanından sürgün etilmesiniñ 71 yıllığını añma tedbirlerinde qırımtatar ve Ukrainanıñ diger halqlarına qoşula, dep bildirdiler AQŞ Devlet departamentinde ve Rusiyeniñ ukrain Qırımınıñ işğalini toqtatmağa çağırdılar.
Devlet departamentiniñ vekili Jeff Ratke bazarertesi künü, mayıs 18-de, qayd etti ki, bu sene yarımadada qırımtatarlarğa bu künni ananeviy matem numayışı ile qayd etmege yasaq ettiler.
Beyanatta aytıla ki, yalıñız Stalin zamanında degil, şimdiki vaqıtta da qırımtatarlar Rusiye tarafından işğal etilgen Qırımda zorluq çekeler. Olarğa nisbeten insan aqları bozula, bunı toqtatmaq kerek, dep aytıla beyanatta.
AQŞ Rusiyeni Qırım işğalinden sebep takbih eteler, onı tanımaylar ve Rusiye işğalini toqtatmağa çağıralar, dep ayttı Devlet departamentiniñ vekili.
Bundan ğayrı, AQŞ Ukraina mustaqilligi ve topraq bütünligine, Ukrainada insan aqlarına riayet etilmesine qoltutalar, dep bildirdiler Washingtonda.
Mayıs 18-de Kiyevde ve Ukrainanıñ diger şeerlerinde, em de çetelde Qırımtatar halqı sürgünliginiñ qurbanlarınıñ hatırasına matem tedbirleri olıp keçti.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Bu sene Qırımtatar Milliy Meclisine miting keçirmege izin bermediler.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Aqmescitte bazarertesi künü Qırımnıñ Rusiye akimiyeti qırımtatarlarğa sürgünlik yıllığına bağışlanğan avtoyürüşni keçirmege izin bermedi. Aktsiyanıñ iştirakçilerini başta OMON blok etti, soñra ise yaqalap politsiya bölügine alıp kettiler.
