Link açıqlığı

Qırımda politsiya Aqmescitniñ demir yol vokzalında yaqalanğan «Za prava çeloveka» («İnsan aqları içün») neşiriniñ jurnalistlerini azat etti. Qırım.Aqiqatqa berilgen malümatqa köre, politsiya hadimleri jurnalist Yekaterina Lısenkonı, bir qaç saatten soñ ise Aleksey Russkihni de azat ettiler.

İnsan aqları Qırım alan missiyası bildire ki, jurnalistlerni qabaatlamadılar, olarğa «sual berdiler». Uquq qorçalayıcılar suallerniñ mevzularını aydınlatmadılar.

Qırım.Aqiqatnıñ elde etken malümatına köre, politsiya hadimleri yaqalanğanlarnen subetleşip, «bugün böyle kün, havfsızlıq yüksek olmalı. Bu sebepten şübe doğurğanlarnı rayon bölügine alıp ketemiz», dep ayttılar.

Politsiya hadimleri jurnalistlerniñ parmaq iznini almaq istediler, lâkin adliyeci buña izin bermedi.

«Za prava çeloveka» jurnalistleriniñ yaqalanğanını Qurultay Merkeziy saylav komissiyasınıñ reisi Zair Smedlâyev Facebook saifesinde bildirdi.

Qırım politsiyası bunı izaatlamadı.

Qırım.Aqiqat bildirgeni kibi, mayıs 18-de Aqmescitte uquq qoruyıcı organlarnıñ hadimleri qırımtatar sürgünliginiñ qurbanları hatırasına keçirilgen avtoyürüş iştirakçilerini «Zapadnaya» avtostantsiyasında blok ettiler.

Aman-aman 60 kişini yaqaladılar.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Bu sene Qırımtatar Milliy Meclisine miting keçirmege izin bermediler.

Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

XS
SM
MD
LG