Qırımtatarlar aqiqat ve azatlıq içün küreşken halqnı yeñmek imkânsız olğanını bütün dünyağa kösterdiler, – dep ayttı Ukraina prezidenti Petro Poroşenko bazarertesi künü, mayıs 18-de, qırımtatar sürgünliginiñ qurbanları hatırasına Kiyevdeki operasında keçirilgen hatıra kontsertinde, – dep bildire Qırım.Aqiqat mühbiri.
Ukraina prezidenti çıqışta bulunıp qırımtatar halqı sürgünliginiñ qurbanları hatırasına sükünet daqqasını ilân etip, qırımtatarlar şimdi de Qırımda basqı altında bulunalar, dep qayd etti.
«Bizler yalıñız qırımtatarlarnı degil, sürgün olunğan diger halqlarnı da añamız... Qırım işğali neticesinde qırımtatarlar siyasiy aq-uquqlarından ve vatandaş serbestliginde marum qala bileler», – dep ayttı Poroşenko ve qayd etti: «Qırım «rus deñizcileriniñ» ğururı degil, Qırım – qırımtatarlarnıñ Vatanıdır».
Ukraina prezidentiniñ aytqanına köre, şimdi qırımtatar milliy muhtariyetiniñ meydanğa ketirilmesiniñ yol haritasını azırlamaq kerek.
Poroşenko Qırımnıñ keri qaytarılması aqqında aytıp, yaqında «Aqmescit» ava limanına Sovetler Birliginiñ eki defa qaramanı Amet-Han Sultan adı berilgenini hatırlattı.
«Quvulğanlar Sovetler Birliginiñ eki defa qaramanı Amet-Han Sultan adına ava limanından tuvğan toprağına qaytacaqlar», – dedi o..
Mayıs 18-de Kiyevde «Qırımtatar halqı genotsidiniñ qurbanlarını añma aqşamı» keçirile.
Saat 16-da başlağan eki saatlik aqşam programması eki qısımdan ibaret. Resmiy qısımda Ukraina prezidenti Petro Poroşenko, Ukraina baş naziri Arseniy Yatsenük, Qırımtatar Milliy Meclisiniñ reisi Refat Çubarov, Ukraina medeniyet naziri Vâçeslav Kirilenko çıqışta bulunacaqlar.
Tedbirniñ bediiy qısmında: rejissör Sergey Proskurniniñ oyunı, qırımtatarı olğan Ukraina halq artisti Jamala, Ukraina halq artisti Yevgeniy Nişçuk ve diger sanat erbaplarınıñ çıqışları.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
