Link açıqlığı

Saatnıñ esas haberi

Politsiya Aqmescit avtoyürüşiniñ aman-aman 60 iştirakçisini yaqaladı


Qırımda uquq qoruyıcı organlarnıñ hadimleri qırımtatar sürgünliginiñ qurbanları hatırasına keçirilgen avtoyürüş iştirakçilerini blok etti.

Qırım.Aqiqatqa berilgen malümatqa köre, tahminen 60 insannı yaqalap, Pavlenko soqağındaki rayon bölügine alıp kettiler. İlk malümatqa köre, aktsiyanıñ çağına yetmegen iştirakçilerini yaqalamadılar.

«Avtobusnı gençlerimiznen toldurıp, rayon bölügine alıp kettiler. Ayvanlarnı kibi yüklediler», – dep ayttı şaatlardan biri Qırım.Aqiqatqa.

«Aktsiyamız kimge keder ete? Aqmescitten Bağçasarayğa bayraqlarnen barmaq istedik. Anda körüşip, dua oqup qaytmağa planlaştıra edik. Birine keder etip, «bahtlı» Qırım resimini bozamız, ğaliba», – dep ayttı avtoyürüş iştirakçilerinden biri.

Yolnıñ bu qısmını avtozaklarnen blok etken ediler, şimdi yol açıldı.

Qırım politsiyası izaatlar bermey.

Qırım.Aqiqat bildirgeni kibi, mayıs 18-de Aqmescitte uquq qoruyıcı organlarnıñ hadimleri qırımtatar sürgünliginiñ qurbanları hatırasına keçirilgen avtoyürüş iştirakçilerini «Zapadnaya» avtostantsiyasında blok ettiler.

OMON hadimleri qırımtatar bayraqlarınen kelgen maşinalarnıñ yolunı qalqanlarnen qapattılar.

Vaqia yerine Qırımnıñ Rusiye milletlerara munasebetler devlet komitetiniñ reisi Zaur Smirnov ve Qırımnıñ Rusiye baş naziriniñ muavini Ruslan Balbek keldiler. Smirnov dedi ki, iştirakçiler arasında Ukraina bayrağını kördiler.

Avtoyürüş iştirakçileri akimiyet vekillerine olarnıñ yanında milliy qırımtatar bayraqlarından ğayrı başqa bir şey olmağanını bildirdiler.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Bu sene Qırımtatar Milliy Meclisine miting keçirmege izin bermediler.

Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

XS
SM
MD
LG