Link açıqlığı

Aqmescitte «Yüregiñde ateş yaq» aktsiyasına bir sıra jurnalistni kirsetmediler


Aqmescitte mayıs 17 künü Lenin meydanında keçirilgen «Yüregiñde ateş yaq!» aktsiyasına bir sıra jurnalist kirip olamadı.

Şu cümleden, teşkilâtçılar tedbirge bazı Qırım ve çetel matbuat vastalarınıñ temsilcilerini kirsetmege istemediler. Söz ATR birinci qırımtatar telekanalı ve Avropa matbuat vastaları aqta kete. Qararnı jurnalistler Aslan Smirnov rebereligindeki Qırımtatar yaşlar komiteti tarafından azırlanılğan aktsiyağa akkreditatsiyadan keçmegeni ile añlattılar.

Birazdan belli olğanı kibi, akkreditatsiyanı Qırım nazirler Şurası keçirgen edi, amma bu aqta Rusiye ükümetiniñ resmiy saytında bir şey yazılmağan eken. Bazı federal kanallarnıñ hadimleri de bu kibi problemlerge rastkelip, tedbir teşkilâtçılarına öz hoşnutsızlığını bildire edi. Olardan bazıları itiraz bildirip, Lenin meydanını terk ettiler.

Meydanda bulunğan jurnalistlerniñ çoqusı aktsiya keçirilgen yerge cedvelsiz, er istegen insannı kirsetkenlerinden ayrette qaldı.

Qırım.Aqiqat bildirgeni kibi, aktsiyada bütün havfsızlıq qararları alındı. Meydan etrafınan demir inşaatları, iç ve tışında politsiya, havfsızlıq hızmeti, Qırım «halq imayesi» temsilcileri buluna edi.

Uquq qoruyıcı organlar temsilcileriniñ bu sayıda bulunuvı tedbirde cumhuriyetniñ birinci şahısları – Qırımnıñ Rusiyeli başı Sergey Aksönov, Rusiye devlet şurasınıñ spikeri Vladimir Konstantinov, Aqmescit akimiyeti vekilleriniñ olğanı ile añlatıla. Olar birinci nevbette çıraqlarnı yaqqanlar. Teşebbüsçileriniñ aytqanı kibi, meydanda çıraqlardan Qırım haritası, ortasında ise tamğa yapılğan edi. Bundan soñ cemaatçılıq aktsiyağa qoşuldı. Umumen mında 250-300 insan toplandı. İştirakçiler ellerinde qırımtatar ve Rusiye bayraqlarını tuta edi.

Aktsiya eki saat devam etti, şu vaqıtta Qırım muzıkalı teatri yanında qırımtatar yırcıları – Güzel ve Seytabla Memetov çıqışta bulunğan edi. Nazirler şurası binasınıñ pencerelerinde de çıraqlarnı yaqtılar.

Qırım.Aqiqatqa teşkilâtçılardan biri aytqanı kibi, bu kibi aktsiya Lenin meydanında keçirilirmi-yoqmı, bunı soñki daqqağace bilmey ediler. «Er şey soñ daqqada çezildi, yuqarıdan izin kelgeninden soñ», – dey o.

Aktsiya vaqtında Nazirler şurası binası üzerinde seyirciler ateş kürrelerini kördi. Böylece, akimiyet tarafından azırlanılğan tedbirde iştirak etmegenler 1944 senesi sürgünlik qurbanlarınıñ hatırasını añdılar.

«Yüregiñde ateş yaq!» aktsiyası er yıl Qırımtatar yaşlar merkezi tarafından keçirile edi. 2007 senesinden başlap Aqmescitniñ Lenin meydanında keçirile edi, amma bıltır ve bu sene Qırımda Rusiye akimiyeti işbu teşkilâtqa hatıra aktsiyasını keçirmege izin bermey. Ğaye teşebbüsiçsi Qırımtatar Milliy Meclis azası Eskender Bariyev bu sene Qırımda bu aktsiyanı azırlağan insanlarnı «ğaye hırsızlavında» qabaatladı.

Qırımtatar halqınıñ sürgünligi 71 yıllığına bağışlanğan tedbirler Ukraina şeerleri ve çetelde keçti.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG