Link açıqlığı

Qırımtatar Milliy Meclisiniñ reisi Refat Çubarovnıñ fikirince, yarımadanıñ Rusiye akimiyeti tamır halqqa Qırımda sürgünlik yıllığında matem tedbirlerini keçirmege yasaq etip, sovetler deviriniñ tarihı ve cinayetlerini hatırlamağa imkân bermege istemey.

Bunı o Qırım.Aqiqat teleleyhasınıñ yayınında ayttı.

Onıñ bildirgenine köre, çoq yıllar evelsi Rusiyede sürgün olunğan halqlarğa böyle yanaşmağa başladılar. Çubarovnıñ zanınca, toplaşıp keçmişni hatırlamağa imkân berilmegen Çeçenistan, Kalmıkiyada hatıra kibi bir şey yoq.

«Amma Rusiye devletçiligi ile bağlı er angi şeyni qayd eteler. Amma halqlar aqqında, Rusiyeniñ halqı ya da al-azırda işğal etilgen topraqta yaşağan qırımtatar halqı aqqında laf ketse, olarğa hatırlamağa imkân bermeyler, çünki hatıra – totalitar rejimlerine qarşı qorqunç bir silâ, tanklardan küçlü», – dep qayd etti Meclis reisi.

Tafsilâtlıca Qırım.Aqiqat teleleyhasınıñ yañı yayınında seyir etiñiz – Qırımnıñ «yañı» akimiyeti sürgünlik arfesinde kimden qorqa.

Qırımda Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti. Qırım akimiyeti sürgünlik qurbanlarınıñ hatıra kününiñ «yañı formatını» belgiledi. Meclisniñ bir sıra vekili mayıs 18 aktsiyalarınıñ keçirilmesi yasaq olğanı aqqında tenbi aldı.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Kiyevde qırımtatar halqı sürgünliginiñ qurbanlarını añma tedbirleri mayıs 14-te başlaycaq. Ukrainanıñ diger şeerleri, Varşava, Berlinde ve Türkiyede de qırımtatarlarğa qoltutv aktsiyaları keçirilecektir.

XS
SM
MD
LG