Ukrainağa qoltutqan daa bir Qırım faali Leonid Kuzminni mayıs 16-da Aqmescitteki Ekstremizm ile küreş merkezinde («E» Merkezi) sorğuğa çektiler.
Bunı İnsan aqları Qırım alan missiyası bildire.
Kuzminniñ uquq qorçalayıcılarğa bergen malümatına köre, onı «fevral 26 işi» boyunca şaat olaraq sorğuğa çektiler.
2014 senesi fevral 26-da Qırım parlamenti yanında Qırımtatar Milliy Meclis ve «Rus birligi» tarafdarları ile kütleviy miting keçti. Numayışnıñ teşkilâtçıları Meclis reisi Refat Çubarov ve «Rus birligi» lideri Sergey Aksenov oldılar. Çatışmalar neticesinde eki insan elâk oldı. Rusiye Taqiqat komiteti cinaiy işni açtı. Onıñ taqiqatı çerçivesinde Meclis reisiniñ muavini Ahtem Çiygoz yaqalandı.
Mayıs 15-te Aqmescitniñ Kiyev rayon mahkemesi Qırımtatar Milliy Meclisi reisiniñ muavini Ahtem Çiygoznıñ apis müddetini iyül 29-ğa qadar uzattı.
Qırım.Aqiqat bildirgeni kibi, mayıs 16-da saba Aqmescitte Ukrainağa qoltutqan faal Veldar Şukurciyevni «E» merkezine sorğuğa çağırdılar.
Veldar Şukurciyev ve Leonid Kuzmin mart 9-da T.Şevçenkonı añma tedbirinde yaqalanğan ediler.
Mayıs 16-da olar sürgünlik qurbanlarını añmaq içün Çatırdağ töpesine çıqacaq ediler.
