Ukraina Yuqarı Radası Qırımdaki «Aqmescit» ava limanına Sovetler Birliginiñ eki defa qaramanı, uçucı-sınavcı Amet-Han Sultannıñ adını berdi.
Qararğa binaen, artıq ava limanınıñ adı «Amet-Han Sultan adına «Aqmescit» ava limanı» olacaq.
Ava limanı adınıñ deñştirilmesi aqqında vesiqa Yuqarı Radada mayıs 8-de qayd etilgen edi.
Bundan evel qırımlılar qırımtatar halqınıñ uçucısı, Sovetler Birliginiñ eki defa Qaramanı, efsaneviy uçucı-sınavcı Amet-Han Sultannıñ adını bermege çağırğan ediler. Yaqında bunıñ kibi teşebbüsni Qırımdaki «Ukrain medeniyet merkeziniñ» faalleri seslendirdiler. Amma olarnıñ açıq mektübi Qırımnıñ Rusiye devlet şurası ve Nazirler şurası, em de Rusiye Federatsiyasınıñ ükümetine berildi.
2015 senesi fevralniñ soñunda «Qırım birligi» teşkilâtı ve Qırımtatar halqınıñ cemaat şurası Rusiye prezidenti Vladimir Putinge «Aqmescit» halqara ava limanına Sovet Birliginiñ eki defa Qaramanı Amet Han Sultannıñ adını bermege ricası ile muracaat etken ediler.
Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.
2014 senesi mart ayında yarımada Rusiye tarafından işğal etilgen soñ Qırım ava limanları Ukraina ükümetiniñ qararı ile qapatıldı. Anda yapılğan uçaq seferleri Ukraina qanunları ve halqara qaidelerni bozmaqta, bu sebepten ava şirketleri Ukraina ve ICAO halqara cezalarına oğray bile.
Al-azırda Qırımdaki uçaq seferleri yalıñız Rusiye ava şirketleri tarafından kerçekleştirile.
