Link açıqlığı

Qırımtatar kütleviy haber vastalarına qoltutmaq içün «Tsenzurağa yoq» yarışı devam etecek


Qırımtatar kütleviy haber vastalarına qoltutuv işlerini qabul etken «Tsenzurağa yoq! Vatandaşlar serbest memleketlerge qoltutalar» üçünci Halqara yarışı mayıs 25-ke qadar uzatıldı.

Bunı yarış teşkilâtçıları Qırım.Aqiqatqa bildirdiler.

«Yarış başlamasından itibaren bizler dünyanıñ farqlı köşelerinden yüzlernen iş qabul ettik. Bu farqlı memleketlerde vatandaşlar içün tsenzura ve söz serbestliginiñ sıñırlanması müim olğanını tasdıqlay», – dep bildireler teşkilâtta.

Mında «tsenzura qırımtatar kütleviy haber vastalarına tesir etti», dep qayd eteler.

«Bizler Qırımdaki vaziyetke diqqat etmek ister edik, anda insan aqları, şu cümleden qırımtatarlarnıñ aq-uquqları bozula. Tsenzura qırımtatar kütleviy haber vastalarına tesir etti, olar aprel ayında işini toqtatmağa mecbur oldılar. Bizim fikirimizce, cemaat buña diqqat ayırmalı, biz er kesni birdemlik kösterip, qırımtatarlarğa qoltutmaq içün işlerni teslim etmege çağıramız», – dep qayd ettiler teşkilâtta.

Yarış işleri dört tilde qabul etile: ukraince, rusça, inglizce, qırımtatarca. İşlerniñ dört çeşiti bar: resim, esse, şiir, şiar ve multiformatlar.

İşlerni yarış saytına yollamaq mümkün: www.stop-censorship.net.

Yarış ğaliplerini üç jüri belgileycek: ekspert, uquq qorçalayıcı ve internet qullanıcıları.

2015 senesi aprel 1-de ATR ve Lâle qırımtatar telekanalları, Meydan ve «Lider» radioları Rusiye qaydınıñ olmağanından sebep işini toqtattılar.

Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı. Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.

Mayıs 6-da ATR telekanalınıñ muarriri Roman Spiridonov bildirdi ki, ATR qırımtatar telekanalı «cenk balaları» ve 1944 senesi mayıs 18-de olğan qırımtatar sürgünligine bağışlanğan vesiqalı filmler üzerinde işni bitirmekte. Filmler ATR telekanalı ve «15 minut» haber portalınıñ saytlarına qoyulacaq.

XS
SM
MD
LG