Link açıqlığı

ATR qırımtatar telekanalı «cenk balaları» ve 1944 senesi mayıs 18-de olğan qırımtatar sürgünligine bağışlanğan vesiqalı filmler üzerinde işni bitirmekte. Filmler ATR telekanalı ve «15 minut» haber portalınıñ saytlarında yerleştirilecek. Bunı çarşenbe künü, mayıs 6-da, ATR telekanalınıñ muarriri Roman Spiridonov Facebookta bildirdi.

Onıñ aytqanına köre, ATR telekanalınıñ haber muarririyeti haber levhaları ve mahsus levhalarını çıqarmağa ğayrıdan başlaycaq, olarnı da bu saytlarğa qoyacaqlar.

«Aprel 1-den itibaren ATR telekanalı yayınını toqtatmağa mecbur oldı. Lâkin... Al-azırda jurnalistler «Cenk balaları» ve 1944 senesi mayıs 18 facialı adise-vaqiaları – qırımtatarlarnıñ sürgünligine bağışlanğan vesiqalı filmler üzerinde işni bitirmekte. Bundan ğayrı, haber muarririyeti işine qayta – haber levhaları ve mahsus levhalar çıqarılacaq. «Zaman» haberlerini bu saytlarda ögrenmek mümkün», – dep yazdı Roman Spiridonov.

Malüm olğanı kibi, 2015 senesi aprel 1-de ATR ve Lâle qırımtatar telekanalları, Meydan ve «Lider» radioları Rusiye qaydınıñ olmağanından sebep işini toqtattılar.

Aprel 2-de «Qırım» qırımtatar cemaat areketi cumhuriyetti qırımtatar cemaat teleradiokompaniyasını açmağa teklif etti. Qırımnıñ şimdiki yolbaşçısı Sergey Aksönov qırımtatar cemaat teleradiokompaniyasına 177 million ruble ayırılacağını bildirdi.

Yañı cemaat qırımtatar teleradiokompaniyasınıñ adı «Millet» olacaq. Bunı Qırım ükümetiniñ baş nazir muavini Ruslan Balbek bu künleri bildirdi.

XS
SM
MD
LG