Link açıqlığı

Ukraina Yuqarı Radası halqara toplulıqnı «Rusiyeniñ işğal etilgen Qırımda insan aqları ve serbestligine qarşı yapqan basqı areketlerini» takbih etmege çağıra. Deputatlar halqara seviyede tanılğan sıñırlarda Ukrainanıñ uquğını ğayrıdan tiklemek içün Moskvağa basqını quvetleştirmege çağıralar.

Bu aqqında mayıs 14-te qabul etilgen parlament qararında aytıla. Oña 247 deputat rey berdi.

Vesiqada Rusiyeden Qırımda insan aqlarınıñ bozulmasını toqtatmağa talap etile, em de halqara toplulıqnı 1944 senesi qırımtatarlarnıñ yarımada sürgünligini takbih etip, olarnı şimdi ayırımdan qorumağa çağırıla.

«Ukraina Yuqarı Radası... bütün dünya liderleri ve cemaat erbaplarını qırımtatarlarnı ayırımdan ve Rusiye tarafından taqip etilmesinden qorumaq içün bütün ğayretni toplamağa çağıra», – dep aytıla muracaatta.

Deputatlar halqara toplulıqnı Qırımda insan aqları boyunca halqara monitoring missiyasınıñ faaliyetini ğayrıdan tiklemek içün yardım etmege, bunıñnen beraber, Meclisniñ sabıq ve şimdiki reisleri Mustafa Cemilev ve Refat Çubarov, cemaat erbapları İsmet Yüksel ve Sinaver Kadırovnıñ «tuvğan toprağında yaşamaq, Qırımğa kirmek» aqqını ğayrıdan tiklemege çağırdı.

Bundan ğayrı, Yuqarı Rada Rusiyeden Cemilevniñ oğlu Hayserni qaytarmağa, qanunsız alda azatlıqtan marum etilgen Meclis reisiniñ muavini Ahtem Çiygoz, cemaat faalleri Ali Asanov, Mustafa Degermenci, Eksender Nebiyev, Talât Yunusovnı azat etmege talap ete.

Parlament Yuqarı Rada reisi Vladimir Groysmanğa bu muracaatnı Birleşken Milletler Teşkilâtı, Avropa Parlamenti, PACE, OSCE Parlament assambleyası, em de dünya liderlerine yollamağa avale etti.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG