Link açıqlığı

Berlinde bazar künü, mayıs 17-de, qırımtatar halqınıñ sürgünliginiñ yıllığına ve Qırımda insan aqları vaziyetine bağışlanğan numayış ötkerilecek.

Bu aktsiyanıñ teşkilâtçıları Qırım.Aqiqatqa bildirdiler ki, tedbir saat 19.30-da Potsdamer meydanında keçirilecek.

Aktsiya iştirakçileri Qırım yarımadasını ve qırımtatarlarnıñ tamğasını çıraqlardan yapmaq isteyler.

Qırım.Aqiqat saytı bildire ki, bazar künü, mayıs 17-de, Varşavada qırımtatar halqı sürgünliginiñ 71 yıllığına bağışlanğan Ukraina ile birdemlik «Poloniya marşı» keçirilecektir.

Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

XS
SM
MD
LG