Bazar künü, mayıs 17-de, Varşavada qırımtatar halqı sürgünliginiñ 71 yıllığına bağışlanğan Ukraina ile birdemlik «Poloniya marşı» keçirilecektir. Tedbirni Euromaydan Varşava, «Qırım» ve «Otkrıtıy dialog» fondları, em de «Pokoleniye» birligi teşkil eteler.
Tedbir ilânı «Euromaydan Varşava» teşkilâtınıñ Facebook resmiy saifesinde derc etildi, dep haber ete Qırım.Aqiqat.
Teşkilâtçılarnıñ beyanatında aytıla ki, bunıñ kibi yürüş Varşavada bir yıl evelsi de keçirilgen edi.
«Bugün Ukrainadaki vaziyet eyilişmey – Qırım işğal altında, memleketniñ şarqında ise Rusiye istilâsından sebep er kün adamlar elâk ola», – dep aytıla haberde.
«Bizler bu qıyın künde ukrainlerge olarnen beraber olğanımıznı köstermek isteymiz, olarğa yardım etmek ve birdemlik köstermek isteymiz», – dep qayd eteler marşnıñ teşkilâtçıları.
Olarnıñ malümatına köre, tedbir qırımtatar halqı sürgünliginiñ yıllığına bağışlanacaqtır. Varşava marşınıñ iştirakçileri Zamkovaya meydanından Ukraina elçihanesine qadar keçip, çıraqlar, «işğal etilgen Qırımda qalğanlar içün ümüt ışığı» yaqacaqlar.
Tedbirniñ Facebook saiyesinde Ukraina ile birdemlik marşına 350 insan qoşuldı.
Qırım.Aqiqat bildirgeni kibi, Qırımtatar halqı sürgünliginiñ qurbanları hatırasına bağışlanğan esas tedbirler Kiyevde mayıs 14-te başlanacaq.
Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
