Ukraina Yuqarı Radasında «Aqmescit» halqara ava limanına Amet-Han Sultan adınıñ berilmesi aqqında» qarar leyhası qayd etildi, – dep haber ete Qırım.Aqiqat. Böyle bir vesiqa mayıs 8-de 2796 nomerası ile qayd etildi, teşebbüsçisi Ukraina halq deputatı Andrey Teteruk oldı.
Aqmescit ava limanına Amet-Han Sultan adınıñ berilmesi dünyada ve Ukrainada ava limanlarına milliy qaramanlarnıñ adlarını berüv tecribesine esaslana.
«Aqmescit ava limanına efsaneviy uçucınıñ adını bermek teşebbüsi faal muzakere etile ve ukrain ve halqara cemaatı buña qoltuta, onıñ amelge keçirilmesini yerli ve çetel kütleviy haber vastaları aydınlatalar. 2010 senesi bu aviatsion müessiseniñ idare reisi V.Anufriyev Aqmescit ava limanına Amet-Han Sultan adınıñ berilmesine resmiy şekilde razılıq bergen edi», – dep aytıla vesiqada.
Leyha müellifiniñ fikirince, qarar qabul etilse, «ömür boyu halqına, devletine ve dünya aviatsiyasına hızmet etken ulu uçucınıñ adı ebediyleştirilecek, genç ukrain vatandaşlarına vatanperverlik duyğuları aşlanacaq, Ukraina akimiyetiniñ vatandaşlarımıznıñ tollerantlığını pekitmek ıntıluvı kösterilecek, cemaatqa onıñ qaraman cebecisi, eñ yüksek mukâfat – Sovetler Birliginiñ Qaramanı unvanına eki defa nail olğan yekâne qırımlınıñ hatırasına sayğısı kösterilecek».
Qayd etile ki, ava limannıñ kommunal mal-mülkine ait olması ukrain halqınıñ yüksek temsil organını «Aqmescit» halqara ava limanı» aktsionerler cemiyetine degil», daa çoq yıllar devamında mal-mülk şekline baqmadan çalışacaq Ukraina naqliyat infrastrukturasınıñ strategik obyektine» qaraman uçucınıñ adını bermek aqqından marum qaldırmay.
Malüm ki, qırımlılar qırımtatar halqınıñ uçucısı, Sovetler Birliginiñ eki defa Qaramanı, efsaneviy uçucı-sınavcı Amet-Han Sultannıñ adını bermege çağırğan ediler. Yaqında bunıñ kibi teşebbüsni Qırımdaki «Ukrain medeniyet merkeziniñ» faalleri seslendirdiler.
2015 senesi fevralniñ soñunda «Qırım birligi» teşkilâtı ve Qırımtatar halqınıñ cemaat şurası Rusiye prezidenti Vladimir Putinge «Aqmescit» halqara ava limanına Sovet Birliginiñ eki defa Qaramanı Amet Han Sultannıñ adını bermege ricası ile muracaat etken ediler.
Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.
