Mayıs 7 künü Aqmescitte taqdim etilgen «Ukrain medeniy merkeziniñ» faalleri Aqmescit ava limanı adınıñ deñiştirilmesini talap etecekler. Oña qırımtatar halqınıñ uçucısı, Sovet Birliginiñ eki defa Qaramanı, efsaneviy uçucı-sınavcı Amet Han Sultannıñ adını bermege çağıralar, – haber ete Qırım.Aqiqat.
Bunı Qırımnıñ Devlet şurası ve Nazirler şurasına, em de Rusiye Federatsiyasınıñ ükümetine yollanılacaq beyanatnı aşkâr etken merkezniñ tekşilâtçılarından biri Veldar Şukurciyev bildirdi.
Mektüpte faaller akimiyetni «Ekinci cian cenki qaramanları ve veteranlarınıñ hatırasından artıq faydalanmayıp», «ğalebe aqqında hatıranı söz ve areketleri ile saqlamağa» çağıralar.
Faallerniñ fikrine köre, şimdi bunı etmek içün tam kelişken bir zamandır. Şimdi «Qırım vatandaşlarınıñ barışığı, amanlığı ve kelecegi içün veteranlar aqqında hatıranıñ saqlanuvında kim ne etkenini körmege mümkün olur».
Qırım.Aqiqat bildirgeni kibi, 2015 senesi fevralniñ soñunda «Qırım birligi» teşkilâtı ve Qırımtatar halqınıñ cemaat şurası Rusiye prezidenti Vladimir Putinge «Aqmescit» halqara ava limanına Sovet Birliginiñ eki defa Qaramanı Amet Han Sultannıñ adını bermege ricası ile muracaat etken ediler.
Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.
