Link açıqlığı

Lviv – 20 biñden ziyade qırımlı qıtağa köçip keldi. Olardan bazıları devlet yardımını bekleyler, digerleri ise ukrain iqtisadiyatınıñ inkişafına öz issesini qoşalar. Alim ve Aleksey «Ceennemni» açmaq içün birleştiler. «Inferno» – köçip kelgenlerniñ Lviv soqaqlarından birinde açqan qavehanesiniñ adıdır.

Aleksey Nikitenko 2015 senesi yanvar ayınıñ başına Lvivge keldi. İşke kirip olamadı. Zenaatı tarihçı olğan Aleksey dey ki, aylıqlar alçaq, kira almaq ise üç biñ grivnadan ziyade tutar. Qırımlı çaresini taptı: aprel ayında öz işine başladı.

Aleksey Nikitenko
Aleksey Nikitenko

Diger qırımlı Alim İsmailov ile beraber ve ana-babasınıñ yardımı ile o «ceennem üslübinde» yapılğan qavehaneni açtı. Onıñ içün Lvivde biznesnen oğraşmaq yarımadadan daa qolay. Qırımda Aleksey Livadiya sarayınıñ ilmiy hadimi olıp çalışqan edi, bir vaqıtları biznesnen de oğraştı, amma dey ki, Ukrainanıñ diger şeerlerine köre Lvivde öz biznesini açmaq daa qolay. «Mında Avropa aqımı bar. Nevbetler yoq, böylece qavğalar da olmay. Er şey yahşı teşkil etilgen. Lviv – Avropa şeeri, avropalı tabiat ile», – dep ayta Aleksey Lviv şeeri aqqında.

Qarşı-qarşılıq oyunı: Lvivge – «ceennem», Qırımğa – «cennet»

«Mında kirdik, bunı kördik ve añladıq: mında «Ceennem» olacaq», – dep ayta qavehane saiplerinden biri Alim İsmailov.

Qırımdan köçip kelgenler qavehane açtılar
Qırımdan köçip kelgenler qavehane açtılar

O, Qırımda böyle bir ad ile qavehane açmaq imkânsız olğanından emin. «Lviv – maneviy bir şeer. Ceennem buña zıt kele – adamlarnı meraqlandıra. Qırım ise – büyük bir ceennem... Amma anda «Cennetni» açmaq mümkün», – küle Alim.

O, bir yıl evelsi Lvivge keldi, lâkin birden biznesnen oğraşmağa başlamadı. «Mart 16-da bu «referendumğa» baqtım ve añladım ki, Qırımda yapacaq bir şey yoq», – dep tarif ete ikâyesini Alim.

Yarımadada iCom Apple-tehnikasınıñ birinci tükânları oña ait. Amma Qırımda işini devam ettirmek Alim imkânsız olğanını tüşüne. «Menim esas işim cep telefonlarınen bağlı edi. Qırımda yaşayış seviyesi ve qazanç tüşti, müşterilerniñ imkânları da eksildi. Anda bir şey yapmaqta fayda barmı?», – aytıp soray qırımlı.

Amma daa bir sebep bar. Qırımlı er vaqıt telefonlarnen oğraşmaycaq edi.

«Olıp keçken vaqialar ayatımnı deñiştirmek içün büyük bir sebep oldı», – dep ayta Alim.

Lvivge köçip, o, programmacı olıp çalışmağa başladı. Erkek yarış boyunca «Softserve» outsourcing şirketine kurslarğa kire. 160 adamdan kurslarğa yalıñız sekizi kirdi, şu cümleden Alim. Böylece Alim programmacı oldı. Bundan da ğayrı, startuplarnen oğraştı. Başqalarğa biznesni açmağa «maneviy ve iş ceetinden» yardım etken edi. Şimdi ise – öz biznesine başladı.

«Lvivde işni nasıl tapmaq mümkün» treninginde qırımlı Aleksey ile tanış ola ve olarnıñ qavehane açmaq ğayeleri peyda ola. Al-azırda Alim – programmacı, startupçı, çeburekhane, qavehane ve boyacı ustahanesiniñ saibi.

Alimge adamlarnıñ sayesinde Lvivde çalışmaq daa qolay ola. «Olar mında bam-başqa. Olar qırımlı, qırımlı vatniklerden farqlılar – olar Qırımda çoq edi. Eskiden biz bunı körmegen edik, olarnen yaşadıq, laf ettik, Rusiye-Ukraina bölüngen soñ ise ne olğanları belli oldı. Lvivge kelip, farqına bardım. Mında Allahtan qorqqan dindar adamlar, er daim yardım etmege azırlar, açıqlar ve yardım elini uzatırlar. Ayrı adamlar da bar, amma olar er yerde barlar. Bu adamlardır. Olarnen laf etmek hoş ve çalışmaq qolay», – dep tarif ete qırımlılar ve lvivliler arasındaki farqnı qırımlı.

Alim İsmailov
Alim İsmailov

Lvivde Alim vatanını sağına, amma bugünki vatanını degil. «Qırımnı sağınam, amma ukrain Qırımını sağına. Ketkende hatırlağanım Qırımnı. Ondan soñra eki kere Qırımda oldım. İyün ayında ve noyabr ayında. İyün ayında küçlü Rusiye daa yoq edi – yani er yerde Rusiye yoq edi. Noyabrde kelgende añladım ki, Qırım bam-başqa oldı. Dostlarım sıq-sıq anda barıp keleler ve men er seferinde nasıl, ne bar sorayım? Olarnıñ laflarından añlaşıla ki, şimdi anda olğanlarnı men kesen-kes sağınmayım. Eski olğan, ukrain Qırımını – elbet de, sağınam. Ev çünki. Tuvğan topraq», – dep ayta Alim. Aynı vaqıtta o kerçek Qırımğa keri qaytmağa ümüt ete.

XS
SM
MD
LG