Qırımnıñ Rusiye Federatsiyasınıñ nezaret altında olğanı vaqıtta yarımadada 150-den ziyade insan ğayıp oldı.
Bu aqta Rusiyede insan aqları boyunca vekâletli Ella Pamfilovanıñ yıllıq maruzasında aytıla.
Maruzağa köre, yarımadada 13 qırımtatarı, 24 ukranli ve 119 rus – ğayıp olğandır.
Rusiye ombudsmenniñ aytqanına binayen, qırımlılarnıñ ğayıp oluvı «qıyın meseledir».
Maruzada şusı da qayd etile, Qırım sakinlerniñ ğayıp olması boyunca 2014 senesi tek bir şikâyet kelgen edi.
Bunıñ ile, Qırımnıñ Rusiye İçki işler Nazirliginiñ malütmatına köre, qıdıruvğa 800 insan ilân etilgen, 75 qıdıruv işniñ cinayet hususiyetleri bar, 18 – qırımtatarlarnıñ qıdıruvı ile bağlı.
2014 senesi Qırımda insanlarnıñ ğayıp oluvı başlandı, şu cümleden qırımtatarlarnıñ da. Bunı halqara uquq qoruyıcıları bildirmekteler. Ukraina Milliy havfsızlıq ve mudafaa hızmeti yarımadada 21 qırımtatarnıñ ğayıp oluvını bildire.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler. 2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı.
Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar. Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
