Qırımtatar Milliy Meclisi «Qırım» Fondu» Hayriye teşkilâtınıñ mal-mülkini, şu cümleden Meclisniñ Aqmescitteki binasını, bir de bir diger strukturağa bermek teşebbüsine qoltutmay.
Böyle etip Qırımtatar Milliy Meclisi reisiniñ birinci muavini Nariman Celâl Qırımnıñ Rusiye akimiyetiniñ fondnıñ tevqif etilgen mal-mülkini Qırım musulmanları Diniy idaresine bermek teşebbüsini Qırım.Aqiqatqa izaatladı.
«Bizler «Qırım» Fonduna» qarşı açılğan işniñ «fevral 26 işi» ve «mayıs 3 işi» kibi sebepsiz olğanını tüşünemiz, fondnıñ mal-mülkini tevqif etüv qanunsız, para cezaları ise adaletsiz olğanını aytamız. Bu sebepten, tabiiy ki, bunıñ kibi teşebbüslerge menfiy yanaşamız», – dedi o.
Celâl Qırım Müftiyatı fond mal-mülkini nasıl etip qullanacağını tahmin etmedi.
«Qırım Müftisi aqıllı adam, amma belli şaraitlerniñ basqısı altında buluna. Böyle bir şey olsa (mal-mülk Müftiyatqa berilse – muar.), o, bunı fayda ketirmek içün qullanır», – dedi o.
«Qırım» Fondunıñ» baş müdiri Riza Şevkiyev Qırımnıñ şimdiki akimiyetiniñ tevqif etilgen fondnıñ mal-mülkini, şu cümleden Aqmescitteki Meclis binasını Qırım musulmanları Diniy idaresine bermek teşebbüsini talaf dep adladı.
Milletlerara munasebetler ve sürgün olunğan grujdanlarnıñ işleri boyunca Devlet komitetiniñ reisi Zaur Smirnov dedi ki, «Qırım» Fondu» Hayriye teşkilâtınıñ mal-mülki Qırım musulmanları Diniy idaresine berilmek kerek. Bu teşebbüs Qırımnıñ Rusiye yolbaşçısı Sergey Aksönovğa da seslendirildi.
