«Qırım» Fondunıñ» baş müdiri Riza Şevkiyev Qırımnıñ şimdiki akimiyetiniñ tevqif etilgen fondnıñ mal-mülkini, şu cümleden Aqmescitteki Meclis binasını Qırım musulmanları Diniy idaresine bermek teşebbüsini talaf dep adladı. Bunı o Qırım.Aqiqatqa bildirdi.
«Qırım» Fondunı» utanmayıp talaylar. Kim olsa olsun, bu şeyler qayda ketecek müim degil, ne qadar eyi niyetler olsa da, talaf talaftır», – dep qayd etti Şevkiyev.
«Bizge mındaki qanunlar boyunca ğayrıdan qayd olmağa bermeyler ve men bu niyetlerge eyi fikirlernen yanaşıp olamayım. Al-azırda Müftiyatnıñ siyaseti halqımıznıñ talaplarına uymay», – dep ayttı fondnıñ yolbaşçısı.
Onıñ qayd etkenine köre, Qırımda fond ve onıñ mal-mülkini tevqif etüv boyunca Rusiye qanunlarına köre olıp keçken mahkemeler «qanunsız ve sımarışqa beñzey».
Şevkiyevniñ fikirince, mahkemeniñ maqsadı – Aqmescitniñ merkezinde Meclis yerleşken binanı tutıp almaq.
Fond yolbaşçısınıñ bildirgenine köre, mahkeme teşkilât mal-mülkiniñ tevqif etilmesi ve fond yolbaşçısına qarşı para cezaları aqqında mahkeme qararlarına berilgen bütün şikâyetlerni red etti. Şunıñ içün, Şevkiyevniñ zanınca, Aqmescitteki Meclis binasını para cezası yerine alacaqlar.
Milletlerara munasebetler ve sürgün olunğan grujdanlarnıñ işleri boyunca Devlet komitetiniñ reisi Zaur Smirnov dedi ki, «Qırım» Fondu» Hayriye teşkilâtınıñ mal-mülki Qırım musulmanları Diniy idaresine berilmek kerek. Bu teşebbüs Qırımnıñ Rusiye yolbaşçısı Sergey Aksönovğa da seslendirildi.
