Link açıqlığı

Qırımda Qırımtatar Milliy Meclisiniñ reis muavini Ahtem Çiygoznıñ aqqından kelecek olalar. Bunı çarşenbe künü, mayıs 6-da, Qırımtatar Milliy Meclisiniñ reisi Refat Çubarov Facebook saifesinde Ahtem Çiygoznıñ Aqmescit taqiqat apishanesinde kartserge atılğanını izaatlap bildirdi, – dep haber ete Qırım.Aqiqat.

«Ahtem Çiygoznıñ aqqından kelecek olalar... Mayıs 18 – Qırımtatar halqı genotsidiniñ qurbanlarını añma künü arfesinde kerginleşüv, 2014 senesi fevral 26-da olıp keçken Ukraina topraq bütünligine qoltutuv mitingi iştirakçileriniñ apis cezaları, sorğu ve zorbalıqları işğalcilerniñ qırımtatar milliy areketiniñ faallerini qanunsız mahkeme etmek azır olğanını isbatlay», – dep ayttı Refat Çubarov.

Onıñ bildirgenine köre, bunıñ içün apiske alınğan onlarnen qırımtatarını «Ahtem Çiygozğa qarşı yañlış malümat bermege zorladılar». Refat Çubarov bildire ki, SİZO şaraitlerinde Ahtem Çiygozğa nisbeten farqlı basqı ve şantaj usulları qullanıla.

«Aynı vaqıtta, belli olğanı kibi, 2014 senesi fevral 26-da Qırım Muhtar Cumhuriyeti Yuqarı Radasınıñ binası yanında olıp keçken eki büyük ve maqsadı farqlı olğan mitingni, tabiiy ki de, er biri öz tarafından, Refat Çubarov ve Sergey Aksenov teşkil ettiler. Şübesiz, 2014 senesi fevral 26-da saat 14-te Aqmescitke avtobus ve KAMAZlarnen sarhoş Aqyar «imayecileri» kelip başlağan soñ Sergey Aksenov oña boysunğan ruslarnı kontrol etip olamağan edi», – dep ayttı Qırımtatar Milliy Meclisiniñ reisi.

Qırım.Aqiqat saytı haber etkeni kibi, mayıs 6-da Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar. Ahtem Çiygoz ise açlıq grevine başladı.

2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.

XS
SM
MD
LG