Link açıqlığı

Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge avuştırdılar. Bunı çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl Facebook saifesinde bildire.

Onıñ aytqanına köre, bundan sebep Ahtem Çiygoz açlıqnı ilân etti.

«Ahtem Çiygoznıñ ömür arqadaşı Elmira Ablâlimovanıñ bildirgenine köre, Aqmescit SİZOsında bulunğan Ahtem Çiygoznı iç bir qarar olmağanda kartserge attılar, o, açlıq grevine başladı. «Fevral 26» işi devam ete, «kütleviy çatışmalarda iştirak etkeninden sebep» mesüliyetke çekilgenlerni Ahtem Çiygozğa qarşı malümat bermege zorlaylar, adamlar azatlıqqa çıqmaq içün 2014 senesi fevral 26-da Qırım Muhtar Cumhuriyetiniñ Yuqarı Rada binasınıñ yanında olıp keçken kütleviy çatışmalarda Ahtem Çiygoznıñ teşkilâtçı rolü aqqında aytalar. Bundan evel şaatlar olmağan olsa, bugün 1-2 «şaat» tapıldı», – dep bildire Nariman Celâl.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.

XS
SM
MD
LG