Link açıqlığı

Saatnıñ esas haberi

Aqyar kommunistleri Stalinni ve ükümetniñ istifasını talap eteler


Aqyarda mayıs 1-de tahminen yüz kommunist ve olarnıñ tarafdarları Nahimov meydanında mayıs bir bayramı munasebetinen toplaştılar. Qırım.Aqiqat mühbiri bildire ki, toplaşqanlarnıñ qollarında Rusiye Federatsiyasınıñ Kommunistler firqasınıñ (KPRF) bayraqları, Lenin ve Stalinniñ fotosüretleri, em de «Stalin ile Vatan içün!» levhası bar edi.

KPRF Aqyar şeer komitetiniñ birinci kâtibi Vasiliy Parhomenko çıqışta bulunıp bildirdi ki, «Rusiye aqqında arz etken» Aqyar sakinleri «zenginler ve halq arasında büyük farq olğan» memleketke tüştiler.

Aqyarnıñ qanun çıqarıcı meclisiniñ deputatları aqqında aytıp, kommunistlerniñ lideri böyle dedi: «Saylavlardan soñ ertesi künü aqyarlılarnı satqan akimiyet bizge kerekmey».

KPRF Aqyar şeer komitetiniñ ekinci kâtibi Sergey Bogatırenko mitingde toplaşqanlarğa birleşip, «kapitalizmniñ tişlerine urmağa» teklif etti.

Kommunistlerge qoltutqan «Sovet zabitleriniñ birligi» cemaat teşkilâtınıñ vekili Gumar Mingazov bildirdi ki, «burjuaziyalı Rusiyede sovetlerge qarşı faaliyet alıp barıla».

Faal Aleksey Merkulov mitingde çıqışta bulunıp dedi ki, «bugünki Rusiyede çalışmaq ve içtimaiy faydalardan qullanmaq imkânları yoq».

O, Aqyarnıñ Qanun çıqarıcı meclisinde «sovetlerge qarşı çıqqanlar ve vlasovlarnıñ tarafdarları» otura, dep ayttı.

Miting rezolütsiyasında kommunistler qayd eteler ki, bugünki Rusiyede «zengin ve fuqareler arasında 40 qatlı içtimaiy bölünüv bar», ve «zemaneviy Rusiye cemiyetiniñ yaraları – fiyatlarnıñ artması ve mesken-kommunal hocalıq» olğanını ayttılar.

Kommunistler Rusiye Devlet dumasınıñ deputatlarından Dmitriy Medvedevniñ ükümetini istifağa yollamağa talap ettiler.

Mitingden soñ onıñ iştirakçileri kolonnağa tizilip, şeerniñ merkeziy soqaqlarını kezdiler.

XS
SM
MD
LG