Türkiye eyyetiniñ qırımtatar ealisiniñ yaşayışını ögrenmek maqsadı ile yapqan Qırım ziyareti «informatsion yalanlarını» yoq etmege yardım etecek, – dep tüşüne Oleg Rodivilov. O, Rusiye Tış işler nazirliginiñ avalesi ile eyyetniñ yanında buluna.
Bunı o, Qırım.Aqiqatqa bildirdi.
«İnformatsion aqınları yalanlarnı uydurdılar, olarnı vaziyetni yerde ögrenip teşkermek kerek. Bu inspektsiya ya da monitoring degil. Bu şahsiy bulunuv – yüz kere eşitmek yerine bir kere körmek daa yahşıdır. Bu ürmetli adamlar, uquq qorçalayıcılar, uquqçılar, ilim vekilleri, özüni siyasetçi saymaylar, çünki eyyet ğayrı resmiy ve olar siyasetke qarışmağa istemeyler», – dedi Rodivilov.
Onıñ aytqanına köre, eyyet maqsadları arasında – «yañı Rusiye Qırımı ile» tanış olmaq, qırımtatarlar ise, ya da, Rodivilov aytqanı kibi, «qırımtatar etnik gruppası», olarnı «din yaqınlığı ceetinden» meraqlandıra.
Onıñ qayd etkenine köre, Türkiye Tış işler nazirligi Rusiye Tış işler nazirligine muracaat etip, Qırımda eyyetniñ yanında olmağa rica etti.
Bazarertesi künü, aprel 27-de, Aqmescitke ğayrı resmiy Türkiye eyyeti keldi. Qırımtatarlarnıñ Qırımdaki vaziyetini ögrenecek olğan eyyetniñ erkânında alim ve uquq qorçalayıcılar bar.
Eyyet erkânına Türkiye Büyük Milliy Meclisiniñ AK Partili sabıq deputatı Mehmet Zafer Üskül, Türkiye parlamentiniñ insan aqları saasındaki tedqiqler komissiyasınıñ sabıq yolbaşçısı, uquq qorçalayıcı Levent Korkut, Tış iqtisadiyat alâqalar Şurasınıñ Avrasiya regionınıñ memleketleri ile işbirlik koordinatorı Çala Mazlum, em de Türkiye aliy oquv yurtlarınıñ bir qaç hadimi kirmekte.
Qırımtatar Milliy Meclisiniñ reisi Refat Çubarov Türkiye parlamentiniñ vekilleri eyyetiniñ Qırım ziyareti boyunca neticeler çıqarmağa aşıqmamağa çağırdı. Çubarov çarşenbe künü, aprel 29-da, Facebook saifesinde bildirdi ki, bunıñ kibi eyyetniñ yollaması, onıñ maqsat ve vazifeleri, Qırımdaki iş cedveli er bir taraf, şu cümleden qırımtatar halqınıñ milliy lideri Mustafa Cemilev ile muzakere etilgen edi.
