Link açıqlığı

Çubarov Türkiye eyyetiniñ Qırım ziyareti Ukraina ve Meclis ile muzakere etilgenini bildire


Qırımtatar Milliy Meclisiniñ reisi Refat Çubarov

Qırımtatar Milliy Meclisiniñ reisi Refat Çubarov Türkiye parlamentiniñ vekilleri eyyetiniñ Qırım ziyareti boyunca neticeler çıqarmağa aşıqmamağa çağırdı, dep haber ete Qırım.Aqiqat.

Çubarov çarşenbe künü, aprel 29-da, Facebook saifesinde bildirdi ki, bunıñ kibi eyyetniñ yollaması, onıñ maqsat ve vazifeleri, Qırımdaki iş cedveli er bir taraf, şu cümleden qırımtatar halqınıñ milliy lideri Mustafa Cemilev ile muzakere etilgen edi.

«Qırımda Türkiye Cumhuriyetiniñ Ükümeti şekillendirgen ve yollağan ğayrı resmiy eyyet buluna. Ziyaretniñ halqara-uquq tarafları evelden Türkiye reberligi tarafından Ukraina prezidenti ile qonuşıldı: ziyaret yolu da şu cümleden: Ankara-Kiyev-Moskva-Aqmescit. Tabiiy ki, bizler işğalci akimiyet, hususan onıñ Qırım qoqlaları, eyyetniñ Qırımdaki işi devamında istegenini kerçek olaraq tanıtacağını tahmin ettik. Sizlerden bazıları Qırım qoqlaları bildirgen yañlış malümatlarğa ğayet büyük emiyet bere», – dep qayd etti Refat Çubarov.

Onıñ aytqanına köre, Türkiye Cumhuriyetiniñ ğayrı resmiy eyyetiniñ azaları «tecribeli ve bunıñ kibi vaziyetlerde bilgileri olğan adamlardır».

«Qırım gebbelsleriniñ yañlış malümatından soñ alğan menfiy duyğularıñızdan sebep olarnı qabaatlamağa aşıqmañız», – dep qayd etti Qırımtatar Milliy Meclisiniñ reisi.

Refat Çubarov qayd etti ki, bu künleri New Yorkta, şu cümleden Birleşken Milletler Teşkilâtınıñ memurları ile iş körüşüvlerde, Qırımda insan aqlarınıñ bozulması muzakere etildi.

«Bir şeyden emin oluñız: Qırımda bulunması sebebinden qasevetlenmek sebepleri olsa da, olar yalıñız işğalciler ve olarnıñ tarafdarlarına ait. Cinayetçilerniñ ceza vaqtı yavaş yaqınlaşa, amma mıtlaqa kelecek», – dep ayttı Refat Çubarov.

Bazarertesi künü, aprel 27-de, Aqmescitke ğayrı resmiy Türkiye eyyeti keldi. Qırımtatarlarnıñ Qırımdaki vaziyetini ögrenecek olğan eyyetniñ erkânında alim ve uquq qorçalayıcılar bar.

Eyyet erkânına Türkiye Büyük Milliy Meclisiniñ AK Partili sabıq deputatı Mehmet Zafer Üskül, Türkiye parlamentiniñ insan aqları saasındaki tedqiqler komissiyasınıñ sabıq yolbaşçısı, uquq qorçalayıcı Levent Korkut, Tış iqtisadiyat alâqalar Şurasınıñ Avrasiya regionınıñ memleketleri ile işbirlik koordinatorı Çala Mazlum, em de Türkiye aliy oquv yurtlarınıñ bir qaç hadimi kirmekte.

XS
SM
MD
LG