Link açıqlığı

Qırımtatarlarnıñ al-vaziyetini örgenmek içün Qırımğa kelgen Türkiye eyyeti yarımadadaki vaziyet ve tamır halqınıñ aq-uquqları aqqında yañlış malümat aldı.

Böyle bir fikirni Qırımtatar Milliy Meclisiniñ reis muavini İlmi Ümerov Qırım.Aqiqatqa bildirdi. O, Türkiye eyyeti reberiniñ qırımtatarlarnıñ yaşayış şaraitlerinden memnün qalğanı aqqında aytqanlarını izaatladı.

Qırımnıñ Rusiye ükümetiniñ milletlerara munasebetler ve sürgün olunğan grajdanlarnıñ işleri boyunca devlet komiteti Türkiye eyyetiniñ reberi Mehmet Üskülniñ aytqanlarına esaslanıp bildirdi ki, qırımtatarlar raat yaşaylar.

«Eyyetimiz mında bulunğan eki kün içinde bizler Qırım ükümeti, cemaat vekilleri ile körüştik, qırımtatarlar toplu yaşağan yerlerni ziyaret etti. Bugün körgenimiz – meni tınçlandıra, Qırım tarafına teşekkür bildirip, olarnı da Türkiyeni ziyaret etmege davet etem», – dep tekrarladı Üskülniñ aytqanlarını Qırım komitetiniñ matbuat hızmeti.

İlmi Ümerov bildirdi ki, Türkiye eyyeti Meclis azaları ile körüşkende qaçırılğan ve öldürilgen qırımtatarlar, em de tintüv, apis cezaları ve semetdeşlerniñ sorğuları aqqında malümat seslendirildi. Ümerovnıñ qayd etkenine köre, Üskül temsil organı ile körüşüvge «keç qalıp, körüşüvniñ aman-aman soñuna yetişti».

«Tünevin, Türkiye eyyeti Bağçasarayda Dilâra Seitveliyeva («Ocalar şurası» cemaat teşkilâtınıñ reisi. – muar.), Edem Dudakov (Qırımnıñ milletlerara munasebetler ve sürgün olunğan grajdanlarnıñ işleri komitetiniñ sabıq reisi. – muar.) ve Elmira Ablâlimova (Bağçasaray tarihiy-medeniy qoruğınıñ sabıq müdiri. – muar.) ile körüşkende Mehmet bey eyyet erkânında yoq edi. O, Hanlar sarayına barğan edi, anda Qırım musulmanlarınıñ müftisi Emirali Ablayev ve Ayder Acimambetov (Qırım musulmanları Diniy idaresiniñ kâtibi, Meclis reisi. – muar.) bulunğan ediler. Olar anda subetleştiler», – dep ayttı Ümerov.

Onıñ malümatına köre, bu körüşüvde qırımtatarlarğa qarşı olğan Oleg Rodivilov – Qırım Yuqarı Radasınıñ sabıq deputatı, şimdi ise Mustaqil Devletler İttifağı Ukrain filialınıñ müdir muavini iştirak etti.

«Olar eski tanışlar kibi körüştiler, selâmlaştılar ve Rodivilov olarnen beraber ketti», – dedi Ümerov.

«Mehmet Üskül böyle bir şey kerçekten aytsa ya da Devlet komiteti bunı uydursa da, esası şu ki, bu kerçek vaziyetni aks ettirmey», – dep ayttı Meclis reisiniñ muavini.

Ayder Acimambetov Qırım.Aqiqatqa Bağçasaray sarayındaki körüşüvde Rodivilovnıñ iştirakini tasdıqladı. Amma Rodivilovnıñ Türkiye eyyetine ne alâqası bar aytıp olamadı

Bazarertesi künü, aprel 27-de, Aqmescitke ğayrı resmiy Türkiye eyyeti keldi. Qırımtatarlarnıñ Qırımdaki vaziyetini ögrenecek olğan eyyetniñ erkânında alim ve uquq qorçalayıcılar bar. Türkiye eyyeti Qırımda aprel 30-ğa qadar bulunacaq.

XS
SM
MD
LG