Herson vilâyetiniñ Kalançak kiriş noqtasında Ukraina havfsızlıq hızmetiniñ hadimleri Ukraina Devlet sıñır hızmeti ile beraber Qırım Yuqarı Radasınıñ sabıq deputatı Vasiliy Ganışnı yaqaladı.
Bunı Ukraina havfsızlıq hızmeti yolbaşçısınıñ mesleatçısı Markiyan Lubkivskiy Facebook saifesinde bildirdi.
Onıñ malümatına köre, Ganışnı devlet hainliginde qabaatlaylar.
«Vasiliy Ganış qıdıruvğa ilân etilgen edi. Onı Ukraina Cinaiy kodeksiniñ 111-inci maddesi boyunca cinayette şekleyler», – dep yazdı o.
Lubkivskiy bildirdi ki, yaqın vaqıtta UHH hadimleri yaqalanğannı Kiyevge alıp ketecekler, anda Ukraina Baş prokuraturasınıñ taqiqatçıları endi bekleyler.
Ukraina Baş prokuraturası bir sıra Qırım deputatı, memur ve uquq qoruyıcığa qarşı cinaiy iş açqan edi. Taqiqat areketleri işğalge yardım etken ve yarımadada insan aqlarınıñ bozulmasına alâqası olğan memurlarğa nisbeten taqiqat areketlerini keçirile.
