Link açıqlığı

Amet-Han Sultannıñ eykeli açılacaq yerde Gagarin ve Korolevniñ eykellerini tiklediler


Aqmescitte Korolev ve Gagarin eykelleriniñ açılışı

Bugün Aqmescitte Gagarin soqağındaki «Kosmos» kinoteatriniñ ögünde birinci uçucı kosmonavt Yuriy Gagarin ve raketa kâinat tehnikasınıñ bünyecisi Sergey Korolevniñ granit eykelleri açıldı, dep haber ete Qırım.Aqiqat.

Eykellerniñ müellifleri Anatoliy Dementyev ve Sergey Oleşnâ oldılar, eykel ustahanesiniñ müdiri, «Rus şerefiniñ alleyası» halqara leyhasınıñ reberi Mihail Serdükov büstlerni şeerge ediye etti. «Tarihiy hatıra» leyhasınıñ reisi İgor Yevtüşkinniñ aytqanına köre, eykeller «Rus şerefiniñ alleyası» programmasınıñ bir qısmı ola.

Bu leyha çerçivesinde 2014 senesi yazda Suvorov enişinde Naberejnaya soqağında şair ve aktör Vladimir Vısotskiyniñ eykeli açıldı.

2009 senesi Gagarin soqağında Amet-Han Sultannıñ doğğanına doqsan yıl tolğanı munasebetinen Aqmescit akimiyeti uçucınıñ eykelini tiklemege planlaştırğan edi. Böyle qarar Aqmescit şeer şurasınıñ yarış komissiyası tarafından qabul etilgen edi.

2010 senesi oktâbr ayında o vaqıt Aqmescit yolbaşçısı olğan Gennadiy Babenko bildirdi ki, şeer qurucılığı şurasınıñ toplaşuvında Amet-Han Sultannıñ 3859 mln grivnalıq eykel planı tasdıqlandı. Kinoteatr ögünde landşaft köşesi de açılacaq edi.

Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.

XS
SM
MD
LG