Ukrainanıñ Milliy tarih müzeyi qırımtatar halqınıñ sürgünligi aqqında malümat toplay ve fondlarnı toldurmaq içün yardım soray.
Bu aqqında müzeyniñ Facebooktaki resmiy saifesinde aytıla.
«Müzeyge fondlarnı toldurmağa yardım etiñiz. Genotsidni aydınlatqan fotoresimler, vesiqalar (olarnıñ kopiyaları), mektüp ve diger şeylerni toplamaq kerek», – aytıla beyanatta.
Mayıs 18 künü – Qırımtatar halqınıñ Qırımdan sürgün etilüv künüdir. 1944 senesi o künü qırımtatarlarnıñ birinci treni Orta Asiyağa yollanğan edi.
Qırım işğalinden evel Aqmescitte yıl-yıldan Bütün Qırım matem mitingi keçirilgen edi.
Qırımnıñ Rusiye akimiyeti mayıs 18 künü qırımtatar halqınıñ sürgünligi qurbanlarınıñ hatırasına keçirilgen matem tedbirler yerine yañı bayramnı kirsetecek ola – «quvanç kününi».
