Qırımnıñ Rusiye akimiyeti mayıs 18 künü qırımtatar halqınıñ sürgünligi qurbanlarınıñ hatırasına keçirilgen matem tedbirler yerine yañı bayramnı kirsetecek ola – «quvanç kününi». Bunı Qırım baş naziriniñ muavini Dmitriy Polonskiy Lenta.ru Rusiye neşirinde aprel 6-da derc etilgen intervyüsında ayttı.
«Şübesiz, bu facia yıllığı, qaar künü, lâkin onı elâk olğanlarnıñ hatırasına keçirmek kerek: mezarlıqqa barmaq, qabaatsız zarar körgenlerni evde añmaq. On yıllarnen meclis reberligi adamlarnıñ eksikleri olğanını köstermek içün qırımtatarlar arasında 18 mayıs kününi sahte şekillendirgen edi. Facialarnı qullanıp, halqnıñ muvafaqiyetli inkişafı aqqında planlarnı qurmaq imkânsızdır. Bu, söz sırası, Ukraina akimiyetiniñ büyük hatası, o, er daim de Golodomor, de sürgünlikni qullanğan edi. Eksiklerde küçlü milletni qurmaq mümkün degil», – dep ayttı Polonskiy.
Onıñ bildirgenine köre, bazı qırımtatar cemaatçıları «aprel 21 kününi», Rusiye prezidenti Vladimir Putin tarafından sürgünlik qurbanlarınıñ reabilitatsiyası aqqında buyruğınıñ imzalanmasını aytalar.
«Anda yalıñız qırımtatarlar aqqında degil, anda ermeni, alman, yunan ve Qırımnıñ diger halqları aqqında laf kete. Qaar kününden quvanç kününe keçmek kerek. Aksenov da aprel 21 kününi Qırım halqlarınıñ birleşüvi, kütleviy tedbirler künü olaraq ilân etmek ğayesine qoltutqan edi. Añmaq yavaş kerek, quvanmaq ise – şaqıldap», – dep ayttı Qırım baş naziriniñ muavini.
Mayıs 18 künü – Qırımtatar halqınıñ Qırımdan sürgün etilüv künüdir. 1944 senesi o künü qırımtatarlarnıñ birinci treni Orta Asiyağa yollanğan edi.
Qırım işğalinden evel Aqmescitte yıl-yıldan Bütün Qırım matem mitingi keçirilgen edi.
