Mayıs 18 künü Qırımtatar halqınıñ sürgünligi kününe bağışlanğan fotoresimler sergisinde sürgünlikke oğratılğan on sekiz qırımtatarınıñ ikâyesi taqdim etilecek. «Vatan aqqı. Hatıra aqqı» leyhasınıñ teşkilâtçısı «KrımSOS» cemaat teşebbüsi oldı, dep haber ete Qırım.Aqiqat.
«Leyhanıñ maqsadı cemaatnıñ diqqatını sürgünlik yalıñız qırımtatarlar aqqında olmağanına celp etmektir. Bu başqasınıñ ikâyesi degil, başqasınıñ derti ve hatırası degil. İlk evelâ bu ukrain tarihınıñ bir qısmı, onı tarihiy adise-vaqialarda unutmamaq kerek», – dep aytalar teşkilâtçılar.
Leyhada sürgünlikke oğratılğan adamlarnıñ tuvğanları ya da tanışları iştirak ete bileler, – dep aytıla leyhanıñ Facebooktaki resmiy saifesinde.
Qırımtatarlarnıñ sürgünligi – 1944 senesi mayıs 18-de olıp keçken Qırım Muhtar Sovet Sotsialistik Cumhuriyetiniñ qırımtatar ealisininiñ sürgünligidir. O kün Qırımdan Orta Asiyağa qırımtatarlar, yunan, ermeni, bulğar, alman ve Qırımda yaşağan diger halqlar ile birinci tren yollanğan edi. Sürgünlikniñ resmiy sebebi olaraq bazı qırımtatarlarnıñ natsist Almaniya ile Ulu Vatan Cenkinde işbirligi oldı. 1989 senesi SSCB Yuqarı şurası sürgünlikni qanunsız olaraq tanıdı. 1994 senesi Qırım Yuqarı Şurası mayıs 18 kününi Qırım halqlarınıñ sürgünligi qurbanlarınıñ hatıra künü olaraq tanıdı.
