Qırım Haber Agentligi (QHA) Kiyevde çalışaycaq. Bunı QHA neşiriniñ müdiri Gayana Yüksel Qırım.Aqiqatqa bildirdi.
Onıñ aytqanına köre, agentlik «Roskomnadzornıñ» litsenziyasını alamayıp, Qırımda çalışıp olamay.
«Kerçekten aytsam, Qırımnı terk etmek mecbur olğanımızdan kederlimiz, çünki bizim kibi etnik çizgisi olğan regional kütleviy haber vastasınıñ faaliyeti Qırımdan tış tasavur etilmey. Añlayım, teessuratlar artqaç, amma bizler Qırımda qalmaq ister edik. Şimdilik teşkiliy azırlıqlar ketmekte. Bizler Qırımda çalışmaq içün elimizden kelgenini yapmağa tırışacaqmız», – dep ayttı Gayana Yüksel.
Malüm olğanı kibi, telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
Qırım Haber Agentligi Qırımda 2006 senesi çalışmağa başlağan edi. Haber agentliginiñ informatsion faaliyet subyekti olaraq №124 2005 senesi mart 14-ke ait devlet qaydı aqqında şeadetnamesi mevcut.
