Qırımda söz serbestligi ve mustaqil matbuat vastalarınıñ işiniñ sıñırlamasına cevap olaraq Ukrainanıñ bir sıra cemaat teşkilâtı ve devlet akimiyeti organları «Crimea Action Group» teşebbüsinde birleştiler.
Bunı Kiyevdeki brifingde Ukraina informatsion siyasetiniñ nazir muavini Serğiy Kostınskıy bildirdi, dep haber ete Qırım.Aqiqat.
«Bizler Qırımnıñ mustaqil kütleviy haber vastalarını halqara mahkemelerde qorumaq içün birleştik. Bizler bu siyasetke yalıñız söz serbestligi ve kütleviy haber vastalarınıñ yoq etilmesine olaraq qıymet kesmeyik, lâkin qırımtatar halqı ve qırımlılarnıñ aqqından kelgenini tüşünemiz», – dep ayttı Kostınskıy.
Onıñ bildirgenine köre, «Crimea Action Group» teşebbüsiniñ erkânına «İsmail Gasprinskiy adına Qırım studiyaları» merkezi, Qırımnıñ strategik tedqiqler institutı, Ukraina prezidentiniñ qırımtatar halqınıñ işlerinden vekâletlisiniñ faaliyetini temin etüv bölügi ve informatsion siyaset nazirliginiñ vekilleri kirdiler.
Kostınskıy qayd etti ki, teşebbüsniñ maqsadı halqara toplulıqqa Qırım vaziyeti aqqında haber etmek, em de halqara mahkemelerge muracaat etecek kütleviy haber vastalarına uquqiy yardım köstermektir.
Aprel 1-de aman-aman bütün mustaqil qırımtatar kütleviy haber vastaları yarımadada işini toqtatmağa mecbur oldılar, çünki Rusiye qanunlarına köre qayd olamadılar.
Amnesty International uquq qorçalaycı teşkilâtı akimiyet farqlı tüşüngenlerni susturacaq ola ve mustaqil kütleviy haber vastalarını yoq etecek ola, dep qayd etken edi.
