ATR qırımtatar telekanalı salı künü mart 31-de yaynlavını toqtattı. Soñki saatte telekanal baş müdiriniñ muavini Lilâ Bucurova sözge tesisçi Lenur İslâmov ve baş müdir Elzara İslâmovanı davet etti.
Telekanal yolbaşçılığı telekanalnı qayd etmege ve yayınlavnı devam etmege tırışacağını bildirdi.
Lilâ Bucurova şunı qayd etti ki, «ATR telekanalanıñ qapatıluvı aqta qarar «telekanalğa degil, halqqa tesir etti».
«Bu ğaye muvafaqiyetli olıp çıqacağını beklemek kerekmey. Biz bundan da beterni kördik. Halqımız Stalinni başından keçirdi. Bu problemlerge dayanmazmı? Dayanır. Öz evini öz toprağında qurmağa devam eter. E, bugün yayınlavımız toqtala, amma biz qaytırmız. Biz er zaman qaytamız. Ve kene bir kere «Efirde ATR telekanalı» dermiz», – bildire Bucurovanıñ sözlerini «15 minut» saytı.
Telekanal baş müdir muavini Lilâ Bucurova «sürgünlikte yaşağanlarğa daa da qıyn olğanını» qayd etti.
ATR qırımtatar telekanalı yayınlavını mart 31 künü toqtattı. Qalğan soñki saniyelerini telekanalnıñ icadiy taqımı nezaret ete, bazıları ağlay edi.
Aprel 1 kününden ATR yayınlavınıñ toqtatılması mümkün. Eger de telekanal martnıñ soñuna qadar Rusiye qanuniyetine köre matbuat vastası olaraq qayd etilmese, işi toqtatılacaq.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
