Link açıqlığı

Qırımtatar milliy areketi yarımadada milletlerara qostluq aqqında aytqan, amma tamır halqnı yekâne qırımtatar telekanalından marum qaldırğan akimiyetni ekiyüzlülikte qabaatlay. Milliy areket Vladimir Putin yolbaşçılığında Rusiye akimiyetini ATR media-holdingini saqlap qalmağa çağıra.

Bu aqqında Qırım.Aqiqatta olğan qırımtatar milliy areketiniñ beyanat metninde aytıla.

«ATR media-holdinginiñ qapatılması qırımtatar halqı ve Qırım cemaatına büyük zarar olacaq. Ve soñra «reabilitatsiya», inkişaf, «milletlerara dostluq», «tolerant grajdanlıq cemiyeti» ve «mında asırlarnen yaşağan ruslar ve qırımtatarlar arasında dostluq» aqqında laflar qırımtatarlar içün boş olacaq», – aytıla beyanatta.

Qırımtatar milliy areketinde Qırım yolbaşçısı Sergey Aksenovnıñ ATR milletlerara qavğa çıqara kibi laflarını iftira dep adladılar.

«ATR telekanalı ve ATR media-holdingi bugünde-bugün qırımtatar halqınıñ emiyetli bir içtimaiy-medeniy variyeti ola. ATR şirketi – yalıñız kütleviy haber vastası degil, bu müitte ösken ve çalışqan gençlerdir. ATRde qırımtatarlardan ğayrı başqaları da seyir etken bir sıra yayınlar bar», – aytıla beyanatta.

Mında ATR yalıñız birinci qırımtatar telekanalı degil, seyircileri yalıñız Qırımda ve yalıñız qırımtatarlar olmağan Qırımnıñ eñ populâr ve eñ keyfiyetli telekanalı olğanını qayd eteler.

«ATR media-holdingi milliy medeniyet, til, milliy ananeler ve milliy menlikniñ canlandırılmasına ümüt bere. «Akimiyet» ATR «çekip alınacaq» şahsiy kanal olğanını tüşünmesin. ATR media-holdingi – qırımtatar halqınıñ variyetidir ve onı bir kereden yoq etmege kerekmey», – dep aytalar arekette.

Teşkilât qayd ete ki, Qırım akimiyeti mezkür areketlerinen Rusiye Federatsiyası prezidentiniñ «Ermeni, bulğar, yunan, qırımtatar ve alman halqlarınıñ reabilitatsiyası ve olarnıñ canlanması ve inkişafına devlet yardımı aqqında» buyruğını bozmaqtalar.

«Qırım akimiyetiniñ yolbaşçısı tam tersini yapıp, Rusiye Federatsiyasınıñ reberligini itibardan tüşürmekte. Qırımtatarlar ve qırımtatar kütleviy haber vastaları Qırım akimiyetiniñ esirleri oldılar», – dep qayd etile Rusiye prezidenti, Rusiye baş naziri Dmitriy Medvedev, Rusiye Federatsiyası prezidenti yanında grajdanlıq cemiyeti ve insan aqları şurasınıñ reisi Mihail Fedotov, Rusiye Federatsiyası Baş prokurorınıñ Yuriy Çaykağa yollanğan muracaatta.

Mart 20-de ATR qırımtatar telekanalı Roskomnadzor mektübini aldı. Oña binaen, telekompaniyanıñ Rusiye qanunlarına köre kütleviy haber vastası olaraq qayd olmaq içün bergen arizası kene de baqılmayıp red etildi. Telekompaniya Roskomnadzorğa vesiqalarnı bir qaç kere bergen edi, amma olarnı qaytaralar.

ATR mediaholdingine kirgen diger kütleviy haber vastaları – Lâle qırımtatar bala telekanalı, «Meydan» radiosı ve «Lider» radiosı, em de «15 minut» haber agentligi aynı vaziyetke oğradı.

Qırım ükümetiniñ yolbaşçısı Sergey Aksenov ATR işini tenqid etip, bunıñ kibi siyaseti olğan kütleviy haber vastaları yarımadada çalışamaz.

ATR telekanalınıñ reberligi 2015 senesi aprel 1-den soñ işine devam etip olamaycaqlarını tahmin ete. Bu mesele mart 16-da Jenevada Birleşken Milletler Teşkilâtınıñ İnsan aqları komitetinde muzakere etilgen edi.

Telekanalnıñ işi toqtatıla bile dep, seyirciler ve faal cemaat Rusiye prezidenti Vladimir Putinge yarımadada milliy kütleviy haber vastalarını saqlap qalmaq açıq muracaatını yolladılar.

XS
SM
MD
LG