Link açıqlığı

Mart 18-de Vladivostok şeerinde Qırım işğaliniñ yıllığına bağışlanğan mitingde politsiya «Qırımnı Ukrainağa qaytarayıq!» dep aytqan yerli sakin Semönni yaqaladı, dep bildire «Novosti Vladivostoka» neşiri.

Neşirniñ malümatına köre, erkekni yaqalağan politsiya hadimleri mühbirlerge yapqan areketlerini izaatlamadılar. Semön politsiya maşinasına oturıp, onı Qırımnı Ukrainağa qaytarmaq fikrini seslendirgeni içün yaqaladılar, dep qayd etti.

Çarşenbe künü, mart 18-de, Qırım ve Rusiyede Qırımnıñ Rusiye terkibine qabul etilmesi aqqında añlaşma imzalanmasınıñ yıllığına bağışlanğan bayram tedbirleri olıp keçti.

Aynı zamanda bütün dünya işğal etilgen topraqlarnı tanımağanını daa bir kere hatırlattı.

Avropa birliginiñ çetel işler yüksek temsilcisi Federica Mogherini yarımadada toqtamayıp arttırılğan Rusiye orduları sebebinden qasevetlengenini bildirdi. AQŞ Devlet departamenti işğal etilgen Qırımda insan aqları vaziyetiniñ kerginleşmesini qayd ettiler.

Em Avropa birligi, em de Amerika Qoşma Ştatları qayd eteler ki, Rusiye ve Rusiyege qoltutqan Qırım separatistlerine qarşı kirsetilgen cezalar Rusiyeniñ Qırım işğali bitkenine qadar lâğu etilmeycek.

XS
SM
MD
LG