Bazar künü, mart 15-te, Lvivde Qırım faalleri ve cemaat teşkilâtları referendumnıñ yıllığına bağışlanğan aktsiyanı keçirdiler. Faaller Svoboda caddesindeki Taras Şevçenkonıñ eykeline «Qırım – Ukrainadır», «Donbass + Qırım – bir ağrı» ve «Putin, Ukrainadan elini çek» şiarları ile çıqtılar, – dep haber ete Qırım.Aqiqat mühbiri.
«Men Qırımda qalğan ve bu topraq Ukrainanıñ olğanına qoltutqan adamlarnı hatırlamañıznı isteyim. Olar şimdi esaretke tüştiler, toplaşıp meydanğa çıqıp olamaylar. Ukraina timsalleri sebebinden anda apske ala bileler», – dep bildirdi «Qırım dalğası» cemaat teşkilâtınıñ reisi Oksana Novikova.
Aynı vaqıtta o emin ki, «er şey ögde, ve bizler evge qaytacaqmız». «Bir kün bizler Lviv sakinlerini musafir olaraq davet etip, olarnı Qırım ukrain toprağında körmekten şeref duyacaqmız», – dep qayd etti Novikova.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
