Link açıqlığı

Ukraina Tışqı işler nazirligi Rusiyeni Qırımda yaqalanğan jurnalistni azat etmege çağırdı


Ukraina Tışqı işler naziri Pavlo Klimkin

Ukraina tışqı işler naziri Pavlo Klimkin Rusiyeni cuma künü, mart 13-te, Qırımda FSB tarafından yaqalanğan jurnalist Natalya Kokorinanı azat etmege çağırdı. Bunıñnen beraber, Ukraina Tışqı işler nazirliginiñ yolbaşçısı «Qırımda söz serbestligini yoq etüv esnasını toqtatmağa çağıra».

«Kokorina azat etilmeli. Rusiye istilâcı memleket olaraq Qırımda söz serbestligini yoq etüv esnasında toqtamaq kerek. Qırım Ukrainadır. Bu qadar», – dep yazdı Klimkin Twitterde.

Malüm olğanı kibi, OSCE söz serbestliği reisi Dunja Mijatović Qırımda jurnalistlerge yapılğan basqını takbih etip, «Tsentr jurnalistskih rassledovaniy» haber neşiriniñ jurnalisti Kokorinanı acele sürette azat etmege çağırdı.

Mart 13-te saba «Tsentr jurnalistskih rassledovaniy» mühbiri Natalya Kokorina işdeşlerine saat 8:00 oña ana-babasınıñ dairesine kelmege rica etkenlerini haber etti. O, dairege kelgen soñ onıñnen bağ üzüldi. Tintüvden soñ onı yaqaladılar.

Rusiye uquq qoruyıcıları adliyecini tintüv keçirilgen dairege almasalar da, Kokorinağa kirsettiler.

Cuma künü, mart 13-te, FSB hadimleri işğalden soñ Qırımnı terk etip, al-azırda Kiyevde yaşağan daa bir Qırım jurnalisti Anna Andriyevskayanıñ ana-babası yaşağan dairede tintüv keçirdiler. Jurnalistniñ babasına Aqmescit mahkemesiniñ qararını kösterdiler. Vesiqağa binaen, Andriyevskayağa nisbeten «Qırımda akimiyetni devirmek çağıruvları ile maqale içün» cinaiy iş açıldı.

XS
SM
MD
LG