Sudaqta «fevral 26» işi boyunca daa bir qırımtatarı yaqalandı.
Bunı öz Facebook saifesinde Qurultayınñ Merkeziy saylav komissiya reisi, qırımtatar areketiniñ faali Zair Smedlâyev bildirdi.
«Daa bir vatandaşımız, 1985 senesi doğğan Emirvaliyev Eskender Emirasanoviçniñ yaqalanuvı aqqında haber aldıq», – yazdı o.
Onıñ malümatına köre, Eskender – Suvuq Sala köyüniñ sakini. 2015 senesi fevral 18-de, aqşam, sanki yaqarlıq stantsiyası abravınıñ şaatı olğan Eskenderni 4 belgisiz insan alıp ketken edi.
«Aqmescitniñ Taqiqat komitetinde oña 2014 senesi fevral 26 künü mitingde iştirak etüvi sebebinden qabaatnı bildirdiler. Soñra, 2015 senesi fevral 19 künü, saat 22:00 bir 15-20 insan kelip, evinde tintüv keçirdi», – dep yaza Smedlâyev.
Aytqanına binayen, bu vaqialardan soñ, Eskenderniñ apayı, eki yaşına yetmegen balanıñ anası, biri 6 yaşında, digeri 11 aylıq bala, hastahanege tüşip, mında bir afta devamında yatqan. Bundan soñ onı tibbiy teşkerüvge Aqmescit şeerine yolladılar.
Smedlâyevniñ aytqanı kibi, mart 11 kunü Aqmescitte mahkeme toplaşuvı keçirildi, qararı – 2015 senesi aprel 18-ne qadar apis cezası.
«Emirvaliyev Eskender Rusiye Cinaiy kodeksiniñ 212 maddesi ekinci qısmı boyunca şeklene (kütleviy aktsiyalarda iştirak etüv). Tuvğanları aytqanı kibi, taqiqatçılar Eskenderden Ahtem Çiygozğa qarşı malümatnı ögrenmege isteyler, amma Eskender böyle bir şey aytmadı, em de aytmaz», – dep yaza Smedlâyev.
Mezkür iş boyunca soñki yaqalanğan Talât Yunusovnı mart 13 künü mahkeme eki ayğa apis etti.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.
Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
