Cuma künü, mart 13-de, Aqmescitniñ Kiyev rayon mahkemesi mart 11 künü «fevral 26» işi boyunca yaqalanğan qırımtatar faali Talât Yunusovnı eki ayğa apis etmek kibi qarar çıqardı.
Bunı Qırım.Aqiqatqa faalniñ adliyecisi Cemil Temişev bildirdi.
Onıñ sözlerine köre, imaye işbu qararğa endi itiraz arizasını azırlay.
«Fikrimizge köre, Yunusovğa nisbeten böyle qattı cezanıñ olmasına sebep yoq. O, mitingde iştirak etti, amma bu qadar. Tevqif etilmesine acet yoqtır. Onıñ yaqalanuvı protsessual areket degil de, zaruriy malümatnı elde etmek içün tesir usulıdır», – dedi adliyeci ve üç kün içinde itiraz arizası berilecegini bildirdi.
O, Talât Yunusovda 3 yaşında qızçığı bar olğanını qayd etti.
Çarşenbe künü, mart 11-de, saba Qurman rayonınıñ Temir köyünde (Yastrebovka) 1984 senesi doğma Talât Yunusov yaqalandı. Babasınıñ aytqanına köre, saba saat 7-de evlerine silâlı adamlar kirdi.
Мart 6-da, bu iş boyunca Asan Çaruhov yaqalanğan edi. Bir qaç saat devam etken sorğudan soñ onı azat ettiler.
Bundan evel Rusiye Taqiqat komiteti Qırımtatar Milliy Meclisiniñ reis muavini Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.
«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
