Link açıqlığı

Smedlâyev: Şevçenkonıñ hatırasına keçirilgen miting iştirakçileriniñ yaqalanması – qorqutmaq ıntıluvıdır


Qırımtatar Milliy Qurultayınıñ Merkeziy saylav komissiyasınıñ reisi, qırımtatar areketiniñ faali Zair Smedlâyev

Qırımtatar Milliy Qurultayınıñ Merkeziy saylav komissiyasınıñ reisi, qırımtatar areketiniñ faali Zair Smedlâyev Aqmescitniñ Gagarin bağçasında ukrain şairi Taras Şevçenkonıñ 201 yıllığına bağışlanğan aktsiya iştirakçileriniñ yaqalanmasını «adamlar toplanmasın, Ukraina ve ukrain erbapları aqqında laf etmesinler dep», qorqutmaq ıntıluvı olaraq adladı.

Bunı Smedlâyev salı künü, mart 10-da, Qırım.Aqiqat mühbirine bildirdi.

«Moskvada Maydan qorqusı bar: ya Qırımdan narazılıqlar başlasa», – dep ayttı mahkeme binasına kelgen Smedlâyev.

Qırımtatar areketiniñ faali emin ki, yaqalamaq ya da mahkeme esnasını devam ettirmek içün iç bir sebep yoq.

«Bir de bir timsaller aqqında añlaşmağa kerekmek. Ebet, yasaq etilgen timsaller bar: natsist timsalleri ve onı hatırlağan timsaller – bunıñ içün mesülietli olmalı. Lâkin aktsiyada yasaq etilmegen Ukraina devlet bayrağı bar edi. Sarı-mavı bayraqlar BMT, OSCE ve diger halqara teşkilâtlarda dalğalanmaqta. Devlet timsallerini qullanğan faallerni cezalamaq doğru degildir», – dedi Smedlâyev.

Malüm ki, mart 10 künü toplaşuvnı yarım saatke keçiktirip başladılar. Faaller ukrain kölmeklerinde, sarı-mavı şeritçikler ile ve adliyecilersiz keldiler. Toplaşuv tahminen bir saat sürdi. Neticede faallerni birer-birer makeme etmege qarar alıp, toplaşuvnı martnıñ 11-ne keçirdiler.

Bunıñ ile mahkemeci faallerniñ iş malümatı ile tanışmaq içün vaqıt bermek ricasını qabul etti. Faallerden biri – Vilidar Şukurciyev, mahkemeni bir aftağa avuştırmağa rica etti, amma malümatnı ögrenmek içün bir afta tek berdiler.

Mart 9 künü faalerni – Leonid Kuzmin, Aleksandr Kravçenko ve Vilidar Şukurciyevni politsiya hadimleri yaqaladı, olarnıñ sözlerine köre, sebep – mitingde ukrain timsalleriniñ olmasıdır.

Demir yol mahkemesiniñ nevbetteki toplaşuvı Ukrainağa qoltutqan faallerniñ işi mart 11-de saat 17-de keçirilecek. Kuzmin, Kravçenko ve Şukurciyevni ayrı-ayrı mahkeme etecekler.

XS
SM
MD
LG