Link açıqlığı

Ukraina nazirler kabinetiniñ kâtibiyet klubında mart 10 künü «Qırım işğaliniñ yıllığı. Ne yapıldı?» mevzusında tögerek masa keçirildi. Tedbirniñ teşebbüsçisi Qırımdan mecburen köçip kelgenlerniñ cemaat teşkilâtlarınıñ idare şurası oldı. Tedbirge ukrain ükümetiniñ vekilleri de qoşulmaq kerek edi, amma toplaşuv olarsız keçti, dep haber ete Qırım.Aqiqat mühbiri.

«Qırım işğali devamında olıp keçken vaqialarğa netice çekmek maqsadımız ile bu tögerek masanı azırladıq. Qırımnıñ işğalden boşatılması boyunca akimiyet areketlerine qıymet kesmek ve yarımadanı Ukrainağa qaytarmaq içün yapılacaq areketlerni belgilemek içün toplaştıq. Akimiyetniñ vatandaşlar ile dialogı olmaq kerek edi», – dedi tögerek masa teşkilâtçısı, siyasiy taqiqatlar ukrain mustaqil merkeziniñ analitigi Yuliya Kazdobina.

Muzakerege aman-aman bütün cemaat teşkilâtlarınıñ temsilcileri qoşuldı, akimiyet organlarınıñ vekilleri ise tedbirge öyle de kelmedi. Şu cümleden, teşkilâtçılarnıñ davetini Ukraina içki işler nazirligi, Ukraina milliy havfsızlıq ve mudafaa hızmeti, Baş prokuratura, Adliye nazirligi, Sağlıq saqlav nazirligi, İqtisadiy inkişaf nazirligi, Tasil nazirligi körmemezlikke urdı.

Tögerek masada prezident memuriyetiniñ temsilcileri, Ukraina devlet qayd etüv hızmeti, Gümrük ve Migratsion hızmetiniñ vekilleri bar edi. Halq deputatlarıdan yalıñız «Qırım» firqalarara birliginiñ azası Georgiy Logvinskiy kelgen edi.

Tögerek masa muzakeresi eki blokqa bölüngen edi: Qırımnıñ qaytarılmasına etilecek adımlar ve qırımlılarnıñ anayasa aqlarınıñ temin etüvi. Munaqaşa devamında eñ çoq muzakere etilgen noqta «Qırım serbest iqtisadiy zonası aqqında» qanunı oldı. İştirakçilerniñ fikrine binayen, oña köre, Qırımdan köçip kelgenlerniñ ayatı aksine zorlaştırıla.

Tögerek masanıñ soñunda rezolütsiya qabul etildi. Mında qayd etilgeni kibi, muzakere iştirakçileri Nazirler kabineti ve preziden memuriyeti yanında Qırımnıñ işğalden azat etilmesi boyunca cemaat şurasınıñ açılmasını zaruriy tanıy. Bunıñ ile vesiqada «Qırım serbest iqtisadiy zonası aqqında» ve «İşğal etilgen territoriyalar aqqında» qanunlarında deñişüvler olmaq kerekligi aqqında yazıla.

XS
SM
MD
LG