İnsan aqları Qırım alan missiyasınıñ reis muavini Olga Skripnikniñ fikirince, Aqmescitte Taras Şevçenkonıñ hatırasına keçirilgen mitingde yaqalanğanlarnıñ işlerinde Rusiye qanunlarını qullana bileler. Bunı o Qırım.Aqiqatqa bildirdi.
«Rusiye qanunları öyle yazılğan ki, farqlı qullanıla bile. Şunıñ içün bayraqta «Qırım – Ukrainadır» yazısını ekstremizmnen bağlay bileler. Çağıruvlar separatizm ve ekstremizm olaraq tanıla bile, böyle etip Rusiye Federatsiyasınıñ qanunlarına köre cinaiy mesüliyet belgilene bile», – dep qayd etti uquq qorçalayıcı.
Skripnik emin ki, mitingde Ukraina bayrağınıñ olması ekstremizm aqqında maddege oğramay. Uquq qorçalayıcınıñ fikirince, bayraqta «Qırım – Ukrainadır» yazısı Rusiyeniñ topraq bütünligi bozmaq çağıruvı degil.
Uquq qorçalayıcı miting iştirakçilerini yaqalamaq qararınıñ sebebini de añlamadı.
«Er bir yaqalavnıñ sebebi olmalı. Olarnı ne sebepten bölükke alıp kettiler? İştirakçi ve şaatlar teşkilâtçılarnı bölükke subeke davet ettiler, dep bildirdiler. Lâkin militsiya ile adiy subet olmay: ya celpname, ya şahsiyetni belgilev, ya da protokol tizilmesi», – dedi Skripnik.
Malüm ki, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması.
Politsiya hadimleri Kuzminni Rusiye Federatsiyansınıñ Memuriy bozuvlar aqqında Kodeksiniñ 20-nci maddesine köre mesüliyetke çekecek olalar – nizamnı bozuv ya da toplaşuv, miting, numayış, yürüş ya da piket ötkerilmesi. Jeleznodorojnıy rayon mahkemesiniñ toplaşuvı mart 10-da saat 11.00 ötkerilecektir.
Aqmescitliler Şevçenkonıñ 201 yıllığına aktsiyanı Şevçenko abidesi yanında keçirecek ediler. Amma Aqmescit memuriyeti buña izin bermedi.
