Link açıqlığı

Ukraina Migratsion hızmetiniñ qabaatından sebep qırımlılar işğalcilerniñ «qara cedveline» kirsetile bile


Ukraina Devlet migratsion hızmetiniñ pasport servisi

Lviv ‒ Fevral 18-de memleket içinde köçip kelgen adamlarnıñ meseleleri boyunca komitet diñlevlerinde Ukraina devlet migratsion hızmetiniñ (UDMH) reisi Sergey Radutnıy qayd etti ki, migratsion hızmet qırımlılarnıñ identifikatsiyası içün Qırımğa yollağan muracaatlarına cevap kelmey. Radutnıynıñ aytqanına köre, UDMH Qırımdan köçip kelgenlerniñ vesiqalarını azırlamaq içün bunıñ kibi soratmalar yollamağa mecbur. Faqat uquq qorçalayıcılar işğalciler qırımlı ve qıtağa köçkenlerniñ şahsiy malümatını alacaqlarından qorqalar.

Qırım uquqçısı Vâçeslav Lombrozonıñ aytqanına köre, Ukraina Migratsion hızmetiniñ Qırımğa yollağan muracaatları işğalci akimiyetke qıtağa köçken qırımlılar, em de Ukraina vatandaşınıñ pasportı, çetel pasportı ve bunıñnen bağlı hızmetlerni körgen köçip kelgen adamlar aqqında malümat bermekte.

«Diger malümat da berile bile. Bunı ögrenmek içün «Krımskaya volna» cemaat teşkilâtı UDMH adresine bunıñnen bağlı muracaatnı yolladı», ‒ dep ayttı Lombrozo.

Vâçeslav Lombrozo
Vâçeslav Lombrozo

Uquqçınıñ qayd etkenine köre, migratsion hızmetniñ bunıñ kibi areketleri «Vaqtınca işğal etilgen topraqlarda vatandaşlarnıñ aq-uquqları ve serbestligini temin etüv aqqında» Ukraina qanunını boza. Daa doğrusı doquzıncı maddesini, oña köre devlet organları ve memurlarnıñ işğalciler tarafından qurulğan bir de bir qurumlar ile alâqaları ve işbirligi yasaq etilmekte.

«Bunıñ kibi areketler Ukrainanıñ milliy menfaatlarını temin etmek ve onıñ vatandaşlarınıñ aq-uquqları ve serbestligi qorumaq, halqara añlaşmalarğa riayet etmek ve vaqtınca işğal etilgen topraqlarda Ukrainanıñ anayasa nizamını tiklemek içün yapıla bile. Bese-belli, UDMH işğalci akimiyetniñ organlarına şahsiyetlerni belgilemek içün muracaat etip, mezkür qanunnıñ doquzıncı maddesiniñ dörtünci qısmı belgilegen iç bir maqsatlardan birini yerine ketirmey», ‒ dep qayd etti Lombrozo.

Onıñ aytqanına köre, insannıñ razılığını almayıp, onıñ aqqında malümat berilmesi onıñ aq-uquqlarını bozmaqta. Eñ qorqunçılısı şu ki, bütün malümatlar işğalci memleketke berile, onıñ akimiyeti işğalge qarşı çıqıp, miting ve aktsiyalar ötkergen Ukrainağa qoltutqan faallerni qıdıra bile.

«Siziñ adamlarıñız da, istegeniñizni yapıñız»

Uquq qorçalayıcı Boris Babinniñ fikirince, Radutnıynıñ beyanatı Rusiye istilâsı ve Qırım işğali vaziyetinde ne UDMH, ne de Ukrainanıñ diger devlet strukturalarınıñ organlarınıñ baqışlarına ğayrıdan qıymet kesmekenini ifadeley.

«Bu organlar içün formal muracaatqa formal cevap almaq Vatandan, ve sağlam fikirlerden müimdir. Aynı vaqıtta Radutnıy işğalcilerge qoltutmaydır, çünki çıqışında Qırım muracaatlarınıñ cevapları olmağanına açuvlandı. Meraqlısı şu ki, bir de bir qabarcılıq da yoq ‒ ne Qırım muracaatı, ne de onıñ olmaması içün para berilecek», ‒ dep qayd ete Boris Babin.

Boris Babin
Boris Babin

Ekspertlerniñ aytqanına köre, Qırımğa yollanğan muracaatlar köçip kelgenler içün o qadar telükeli degil, Qırımda yaşağan Ukraina vatandaşlarına daa çoq zarar ketire bile.

«İşğalci akimiyet, tabiiy ki, cemaat faalleri ve ümüt bermegen insanlarnıñ «qara cedvelini» tize. Bunıñ kibi soratmalar ise adamlarnıñ «ümüt bermegenlerniñ» cedveline kirsetilmesine sebep ola. Çünki cemaat erbapları ya da narazılıq bildirgenler aqqında degil, devletimiz ile bağ tutmağa qarar alğan adiy vatandaşlar aqqında laf kete. Bundan ğayrı, vatandaşlarınıñ işğalcilerge «teslim etmesi» ‒ Rusiye içün bir işarettir. Siziñ adamlarıñız da, istegeniñizni yapıñız kibi bir şey», ‒ dep qayd etti Babin.

Qırım.Aqiqatnıñ mühbiri Ukraina devlet migratsion hızmetine vaziyetni añlatmaq ricası ile fevral 23-te muracaat etken edi, lâkin cevap alâ daa yoq.

XS
SM
MD
LG