Baar... Bıltır Qırımda onıñ kelmesini kimse duymadı. Yeşirgen tabiattan zevqlanmaq yerinde, qırımlılar büyük qorqu ve telâş ile fevralniñ soñunda yarımada soqaqlarında arbiy tehnika ile birlikte peyda olğan «yeşil adamçıqlarnı» közete ediler. Başta olar atta Rusiye adetiy tarafdarlarını quvandırmadı – «Rus dünyası» Qırımğa böyle tarzda kelecegini kimse tüşünmey edi.
Eyecan soñ başlandı, «referendum» arfesinde – çünki istilâcı silâlı qarşılıqnı körmedi. Rusiye televizion teşviqatı da öz işini yaptı. Esirlerniñ nesili quvanç ile yañı saibini qabul etti. «Qırımnı qurşunsız zapt etti», – dep, Putinden ayran qala ediler. Şimdi küç aqiqatta degil de, fizikiy ve arbiy üstünlikte olğanı belli oldı…
Şimdi küç aqiqatta degil de, fizikiy ve arbiy üstünlikte olğanı belli oldı…
Qırımtatarlarda bu ceetten iç bir vaqıt hayal yoq edi. Rusiye Qırımğa endi bu yollardan kelgen edi. Qadındar Qırım yollarında barışıq ve bölünmez Ukraina içün plakatlar ile tura edi, martnıñ 8-de bile. Erkekler gecelernen qasabalarnı patrul ete, soqaqlarnı, ev ve camilerni beklenilmegen musafirlerden qoruy, Qırımnıñ çeşit köşelerinde blok etilgen ukrain arbiy qısımlarına aşayt malları ve ilâclarnı ketire ediler. Kimse raat yuqlap olamay edi.
Aqlımda, Facebookta olğan Qırım gruppalarından birinde yarı gece maalinde biri Aqmescit rayonında patlavğa oşağan bir davuşnı eşitkeni aqta yazdı. Şeer soqaqları boyunca yoqlav başlandı, çeşit farzlar seslendirile edi – Meclis ofisini patlattılar, arbiy qısmını zapt ettiler… Şübe doğurmağan malümatnı yarım saatlıq beklevi ebediyen kibi köründi. Vulkanizatsiya stantsiyasında bir ballon patlağanı aqta haber peyda olğanda, er kes raat oldı… Telâş, ümüt ve kerçek olmağan intizar baari edi.
İşğal etilgen Qırımda telâşlı ayat senesi keçti – öldürüv, hırsızlav, kiriş ve tınç toplaşuv yasaqları, mahkeme ve cezalar… Şimdi Vatanımızda indemeyip yaşaymız, amma biliñiz: qorqu degil, halqımız içün adetiy olğan sabır. Sabırnıñ tübü – sarı altındır. Er şey keçer, bu da. Amma kimse unutılmaz, bir şey unutılmaz… Genetik afızamız eyidir… Ukrainadır!
Elzara Beşuyli, qırımlı
«İşğal delilleri» rubrikasında bildirilgen fikirler müelliflerniñ fikir-tüşüncelerini aydınlatıp, muarririyetniñ fikirleri ile aynı olmay bile
Körgen ve bilgen şeyleriñizni bizlernen paylaşıñız, emailge yazıñız: krym_redaktor@rferl.org