Qış Olimpiadasınıñ soñuna qadar bir qaç kün qalğanda, içtimaiy ağlarnıñ vastası ile Qırımda aydavcı, terciman, operatorlarnı qıdırmağa başladılar. Olar mında kelmege başlaylar, şunıñ içün Qırımda olacaq adiseler aqqında tek Rusiyede degil de, çetelde de bile ediler, ğaliba. Çünki ilk künleri mında Qırımda evel olmağan ecnebiy matbuat vastalarınıñ dessantı keldi – öz malümatını bütün dünyağa satqan ileri agentlikler de, şu cümleden. Qırımğa jurnalistlerniñ kelmesi ile yaqında bir şey olacaq degen fikir peyda ola. Böyle kibi duyğudan menim içün işğal başlandı.
Qırımtatarlarnıñ ve «Rusiye birligi»niñ mitingi olğan fevral 26-da qorqu yoq edi. Qorqu Qırım Yuqarı Şurası ve Nazirler Şurası binaları üzerinde Rusiye bayrağı asılğan fevral 27-de peyda oldı. Şu künü keri yol olmağanını añladım, bitti, soñu. Kefe yolunda arbiy tehnikanıñ peyda oluvı ile qorqu saçıla edi. Cenk duygusı edi, evden çıqmağa qorqunçlı. Bunı közyaşsız hatırlap olamayım.
Birden insanlar ekige bölündi, o vaqıt yalıñız memleketini degil de, tuvğanlarını satqan insanlar ile laf etkenimden bile peşmanım. Ekiyüzlü insanlar ekenler, ayatımda olarğa yer yoq.
Soñra er şey tüşümde olğanı kibi körünmege başlandı. Er vaqıt uyanmağa istey edim. Şeer boyunca serbest areket etmege imkân yoq edi. Yuqarı Şura, Nazirler Şurasına yaqınlaşmağa fırsat yoq. Adiy binalar degil de, etrafında – meydan, bağçalar, bundan evel mında kezmege mümkün edi. Er yerde silâlı insanlar. Olar ile foto çekmege, ya gül bağışlamağa, quçaqlamağa, öpmege olarnı istemey edim. Barışıq şeer ve ayatta bu kibi silâlı insanlarğa yer yoq.
Тelüke mında yoq edi. Qırımda «dostluq trenlerni», mında kelecek olğan banderovets, faşistlerni öyle de körmediler
Amma bazı insanlar balalarnı ketirip, şu «yeşil adamçıqlar» ile foto yapa, soñra «azat eticiler» dep, şu fotolarnı içtimaiy ağlarda paylaşa ediler. Neden azat ettiler? Neden, kimden azat etkenlerini añlamay edim. Mında telüke yoq edi ki. Qırımda «dostluq trenlerni», mında kelecek olğan banderovets, faşistlerni öyle de körmediler.
Belgisiz insanlar – sanki yerli eali blok etken arbiy qısımlar etrafında er vaqıt kergin vaziyet üküm süre edi. Amma o vaqıt bu yerli eali degil de, Rusiyeden ketirilgen insanlar olğanı belli edi. Özlerini arbiy qısımğa oğlu, aqayı, babasına kelgen ana ve apay olaraq tanıttıra ediler. Oyun olaraq körüne edi.
İşğal neticesinde qorantamız işsiz qaldı, kelirni ğayıp etti, dotsumız qalmadı – er kes köçip ketti.
Nadejda Svetliçnaya, Aqmescit sakini
«İşğal delilleri» rubrikasında bildirilgen fikirler müelliflerniñ fikir-tüşüncelerini aydınlatıp, muarririyetniñ fikirleri ile aynı olmay bile
Körgen ve bilgen şeyleriñizni bizlernen paylaşıñız, emailge yazıñız: krym_redaktor@rferl.org