Link açıqlığı

Rusiye Birleşken milletler teşkilâtını qırımtatarlar içün tarihiy adaletni ğayrıdan tiklegeninde qandıra


Rusiye qırımtatarlarnıñ toplu yaşağan regionlarğa 600 million dollarnı ayırmağa azır, – dep bildirdi Rusiye İçki işler nazirliginde BMT tertibatı organlarında insan aqları boyunca işbirlik bölüginiñ reberi Aleksey Goltâyev.

RİA Novosti bildirgeni kibi, bu bildirüv mart 3 künü Jenevada İnsan aqları boyunca Şurasınıñ 28-nci sessiyası devamında Rusiye eyyeti içün «cevap aqqı» çerçivesinde yapıldı.

«Qırımtatarlarnıñ toplu yaşağan regionlarğa 2020 senesine qadar 600 million dollar ayırılacaq. Bu sene mesken ve infrastruktura qurucılığına endi 25 million dollar ayırıldı», – dedi BMT İnsan aqları boyunca Şurasında Rusiye eyyetiniñ temsilcisi.

Goltâyevniñ aytqanına köre, Rusiye «tarihiy adaletniñ ğayrıdan tiklenüvi ve qırımtatarlarnıñ lâyıq inkişafı içün er şey yapa, Ukraina ise 23 sene devamında qırımtatar ve repressiyalarğa oğrağan diger halqlarnı aqlamadı bile».

«Şunıñ içün geosiyasiy oyunlarda qırımtatar ealisi ya da onıñ bir de bir qısmını mahsus qullanmaq ayıp olmalı», – dedi Goltâyev.

Avropa birliginiñ tış işler boyunca yuqarı temsilcisi Federica Mogherini Jenevada insan aqları boyunca BMT Şurasınıñ 28-nci sessiyasında çıqışta bulunıp, halqara toplulığını qırımtatar halqınıñ aqları bozuluvına diqqat etmege çağırdı.

XS
SM
MD
LG