Öldürilgen Rusiye muhalifi Bоris Nemtsovnı Moskvada mart 3-de Troyekurovskoye mezarlığında defin ettiler. Radio Svoboda mühbiri bergen malümatqa köre, bir qaç saat sürgen vedalaşuv tedbirge bir qaç biñ insan keldi.
Vedalaşuv tedbirden soñ Nemtsovnıñ cesedini mezarlıqqa alıp kettiler. İnsanlar: «Rusiye azat olacaq!» dep qıçıra ediler.
Rusiye muhalifetiniñ liderlerinden biri Boris Nemtsov fevral 27-de aqşam Moskvanıñ merkezinde Kremlniñ yanında atıp öldürildi. Nemtsovnıñ öldürüvinden üç kün keçkenine baqmadan, taqiqatnıñ ilerilemesi aqta iç bir malümat yoq.
Rusiye Taqiqat komitetiniñ malümatına köre, şaatlar sorğuğa çekile, tış nezaret kameralarından video baqıla, mahkeme ekspertizalar keçirile.
Taqiqatçılar öldürüvniñ bir qaç sebebini ögrene: siyasiy tarik, esktremistlerniñ intiqamı, «ukrain izi», şahsiy sebep.
