Link açıqlığı

Mart 1-den itibaren ukrain kilseleri Qırımda yasaq altında qala


Kiyev patriarhatınıñ Ukrain ortodoks kilsesiniñ dindarları Milât bayramında Qırımda barışıq olması içün dua ettiler

Mart 1-den itibaren Qırımda Rusiye qanunları köre ğayrıdan qayd olmağan ukrain kilseleriniñ faaliyeti yasaq etile. Bunı Din serbestligi institutı Qırım.Aqiqatqa bildirdi.

Qırım akimiyeti bildire ki, Qırımda din teşkilâtlarınıñ ğayrıdan qayd oluv esnası «zor keçmekte». Bunı Rusiye Cemaat palatasınıñ milletlerara ve dinlerara munasebetlerni eyileştirüv komissiyasınıñ Aqmescitteki toplaşuvında Qırım medeniyet nazirliginiñ din ve milliy-medeniy cemiyetler işleriniñ bölük yolbaşçısı Aleksandr Selevko bildirdi.

Onıñ aytqanına köre, din cemiyetleriniñ Rusiye uquq alanına keçüv esnası 2014 senesi dekabr 31-ge qadar yekünlenmek kerek edi, lâkin bu işni mart 1-ge qadar uzattılar, buña baqmadan «bu adım da vaziyetni deñiştirmedi».

Rusiye prezidentiniñ Qırımdaki vekâletli temsilcisiniñ muavini Vladimir Bobrovskiyniñ malümatına köre, yarımadada yalıñız doquz cemiyet ğayrıdan qayd etildi. Daa 73 danesi qayd işlerine devam etmekte. Yalıñız eki din teşkilâtı nizamnamelerini Moskvada qayd etti.

«2014 senesiniñ başında Qırımda 1409 din teşkilâtı yuridik şahıs statusı ile bar edi. Daa 674 din cemiyeti, esasen qırımtatar, qaydsız faaliyet köstergen edi. Soñki 25 yıl devamında Qırımdaki din cemiyetleriniñ sayısı 47-den 2083-ke qadar arttı», – dep qayd etti Din serbestligi institutı.

Ekspertlerniñ aytqanına köre, Ukraina qanunlarına nisbeten Rusiye qanunları dindarlarnıñ ve din cemiyetleriniñ aqqlarını bayağı sıñırlaycaq.

Rusiye Federatsiyasında hastahane, bala bağçaları, ihtiyarlar evleri ve apishanelerde din merasimlerini keçirmek, çetel vatandaşlarını işke davet etmek, sadaqa parasını almaq içün esaplarnı açmaq, ibadet binalarını kirağa almaq aqqları yalıñız qayd olğan din teşkilâtlarında bar.

XS
SM
MD
LG