İşğal etilgen Qırımda fevral 23-te «Aksenovnıñ halq imayesi» kibi belli olğan Qırım halq askerleri taqımınıñ meydanğa ketirilmesiniñ yıllığına bağışlanğan tantanalı tedbirler olıp keçti.
Qırım.Aqiqatnıñ mühbiri bildire ki, bu munasebet ile Aqmescitte «samooborona» vekillerine mukâfat ve medaller berildi, em de olarnıñ şerefine tiklenecek eykelniñ yerinde taş qoyuldı.
Tedbirler Aqmescitniñ Ğalebe skverinde başlandı, Aqmescit Mitropoliti ve Qırım Lazari Ulu Vatan cenkinde ve diger yerli cenk zıddiyetlerinde elâk olğanlarnı añdı. Sükünet daqqasından soñ tedbir iştirakçileri «Tank «T-34» Şan Abidesine çeçek ve çemberlerni qoydılar, akimiyet vekilleri Devlet şurasınıñ binası yanında toplaşqan adamlar ögünde çıqışta bulundılar.
Aynı bu yerde «halq imayesiniñ» qayd etilgen askerlerine nişan, medal ve hatıralıq diplomları berildi.
Tedbirler Nazirler şurasınıñ binası yanında devam etip, «Bütün zamanlarnıñ halq askerleri» abidesi tiklenecek yerde taş açıldı. Cumhuriyetniñ reberleriniñ qayd etkenine köre, bu eykel «Qırım baariniñ» tarihiy vaqialarını ebediyleştirecek. Aqmescit Mitropoliti ve Qırım Lazari dua oqudı.
Kiyevde bazarertesi künü Qırımdan mecburen köçip kelgenler Rusiye elçihanesi yanında piket ötkerip, işğal etilgen yarımadadan ketmege talap ettiler. «Qırım – Ukrainadır» adlı aktsiya martnıñ 15-ne qadar devam etecek.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
